楊明初演舞台劇 被睇好拎新人獎
張慧儀自爆失魂忘記對白
首次演舞台劇的楊明於《雷雨》的演出備受好評，雖然他謙稱僅合格值50分，但好友楊茜堯卻對他有讚冇彈，指楊明應該全職做舞台劇演員，更有潛質奪舞台劇最佳新人獎。
楊明、張慧儀、黎燕珊、陳培甡與陳希寶等前晚在灣仔演藝學院演出舞台劇《雷雨》尾場，連日來吸引蔡卓妍（阿Sa）、關智斌、楊茜堯和徐榮等捧場。首演舞台劇的楊明與張慧儀每日開騷也提早數小時踏台板做準備，楊明說：「因為第一次做舞台劇，所以早啲踩吓台板、行吓位，今次有好多粵劇界嘅老前輩演出，唔想失禮佢哋。」張慧儀指一班前輩舞台經驗豐富，她只能將勤補拙。
楊明演出有板有眼，但謙稱僅合格值50分。問到演舞台劇可有上癮？他笑言：「依家仲係好驚嘅感覺，蓋過咗上癮，但係排咗咁耐，演出滿足感好大，就嚟上癮。」他坦言演出時有輕微「蝦碌」：「因為有少少鼻水，所以令到講嘢有啲𦧲脷。」提到女友莊思明最擔心他忍不住笑，楊明說：「排戲時就忍唔住笑，但一上到台投入咗，就已經冇想笑嘅感覺，直情笑唔出。」張慧儀亦自稱試過「蝦碌」，幾乎忘記對白，但幸好隨即接上：「做舞台劇就有呢種刺激感。」
黎燕珊自嘲「走火入魔」
5場演出圓滿結束，黎燕珊表示終於鬆一口氣，不用再擔心「走火入魔」。她自爆有次在餐廳邊食邊背對白，因太過入戲，嚇得對面食客以為她是傻婆。至於阿Sa和關智斌於舞台劇中場時，到後台為老友陳希寶打氣，並讚黎燕珊與陳培甡演技出色。
楊茜堯以一個「勁」字形容楊明：「第一次睇阿楊做舞台劇，起初擔心佢會甩碌，但出乎意料演得好好，佢仲為咗演礦工曬黑，演技大躍進。佢以後應該做舞台劇演員，唔使拍其他，目標要拎個舞台劇最佳新人獎。」楊明笑言很想承好友貴言，可以有機會拎舞台劇新人獎。
