冇份去鑽油台 陳豪呻人生污點
黃宗澤提供吃喝玩樂 封「大內總管」
黃宗澤（Bosco）於無綫新劇《執法者們》到鑽油台拍重頭戲，他坦言拍攝過程辛苦，但非常值得。該劇另一主角陳豪大呻冇份去鑽油台，非常羨慕Bosco，更笑言視為人生污點！
陳豪、黃宗澤、馬國明、羅子溢、陳瀅、蔡潔和何依婷主演的無綫新劇《執法者們》今晚在翡翠台播映，昨日台前幕後到荃灣出席記者會為劇集造勢，吸引大批市民到場，場面墟冚。Bosco、陳豪與馬明齊齊受訪，談到該劇在內地點擊量逾4億，Bosco笑言：「開心㗎！最緊要大家鍾意，拍得咁辛苦喎。我哋一人一億都三億啦，餘下嗰一億其他（演員）分埋，哈哈！」
談到《執》劇的重頭戲於鑽油台拍攝，Bosco獲無綫高層樂易玲封為「大內總管」，負責提供吃喝玩樂，他說：「我哋創咗電視史首次喺鑽油台取景，我都係第一次去鑽油台咋！辛苦嘅，但Feel到大家齊心，因為大家都未經歷過咁嘅環境。」陳豪大呻：「我冇份去鑽油台係人生嘅污點，真係好羨慕Bosco，呢種經歷唔係人人可以體驗。」
談到劇中女兒何依婷已為人母，陳豪搞笑自稱榮升「公公」，自爆家中9歲囡囡開始憧憬戀愛：「我梗係灌輸中國人嘅思想畀佢，我都同佢講爹哋成咗年先拍拖，佢冇其他選擇，哈哈！估唔到佢都係戀愛腦。（你好驚？）梗係驚啦，話畀佢聽掂吓手仔都好大件事。（你演何依婷爸爸，接受到演一個有咁大個女嘅爸爸？）喺戲劇世界乜都有可能，我都演過郭羨妮老竇。」
吳啟華羅子溢傾唔停
吳啟華與羅子溢相隔9年再合作，兩人表示話題更多，因子溢已育有兩個小朋友，除了傾湊小朋友經，還會傾手錶。問啟華可想再演《妙手仁心》的經典角色「程至美」？他笑言冇所謂，演員就是什麼角色都演。
