江若琳放開前度 再見不是朋友
相隔10年再出情歌
歌手江若琳（Elanne）相隔10年，終於推出全新情歌《流著淚寫句號》，分享這些年她在愛情路上的經歷。她藉着新歌鼓勵失戀的粉絲要學識放手及向前看，覺得祝福前度更重要。她坦言很難與前度做回朋友：「如果當初冇放手，就未必會遇到依家身邊真正啱嘅人。」
江若琳新歌MV邀得好友張繼聰做男主角，講述一對情侶由相戀到分開，學會放下執着與遺憾，衷心祝福對方擁有更美滿的人生。Elanne說：「我一聽到MV故事，發現需要演技，就決定親自上陣。至於對手演員我第一時間諗起張繼聰，一位我近年好欣賞嘅演員。其實當時都未落實拍攝細節，但我已經打電話問佢可唔可以幫手！」張繼聰毫不猶豫答應：「娛樂圈本來就應該互相幫忙。見到Elanne有幸福家庭，仲繼續追夢，當然要義不容辭啦！」
與張繼聰奉旨發脾氣
兩人在MV飾演情侶，問到會否感到尷尬？張繼聰笑言：「我身為一個專業演員，唔會覺得尷尬！」Elanne亦說：「唔尷尬！但唯一要求係我老公唔可以在場，因為佢睇住我會演得唔夠放！」MV不乏爭執場面，兩人拍掃枱、掟嘢、發脾氣等場面真情流露。身為愛妻號的張繼聰為自己平反：「我同老婆平時幾乎冇咩爭執，因為夫妻相處講求融洽，先可以行得長久。」Elanne亦說：「我同老公Oscar由拍拖、結婚到生BB，當然有鬧過大交。但係人大咗，感情變得更成熟，識得冷靜處理，鬧完交都會坐低溝通。如果唔係，就真係變前度。」
Elanne續指：「今次拍MV都有諗番以前嘅經歷，我覺得我自己比較難同前度做得番朋友，因為我覺得要move on，學識放手、祝福對方更重要，大家各自安好就足夠。如果當初冇放手，就未必會遇到依家身邊真正啱嘅人。我希望粉絲可以透過首歌，同我一齊成長。」
