胡子彤「紳士手」 隔空攬姚焯菲
唔敢送「愛的抱抱」
姚焯菲（Chantel）、胡子彤、張蔓莎與張蔓姿前晚到主題樂園出席音樂會，他們除了唱歌外，又與台下聽眾互動，氣氛熱鬧。完騷後，胡子彤被問為何只擁抱張蔓莎與張蔓姿，他即伸出「紳士手」隔空扮攬Chantel，場面搞笑！
胡子彤表示今次演出是很好的經驗，因為是他首次在音樂會獻唱多首歌曲：「可以幫我之後開騷攞經驗，好開心。」他指由綵排到開騷，即使準備充足，亦難免出現意外，例如器材發生故障：「依家知道做一個騷要點樣去分配，就好似拍戲咁，每日可能拍10個鐘或者拍成個月，唔能夠每分每秒都係好用力嘅狀態，今次學識合理分配係最大收穫。」
提到Chantel演出時米高峰沒有聲，頻頻摸耳機，問到是否器材出現問題？她坦言甫開場打招呼已發現米高峰沒聲，耳機亦有少少問題，但沒有影響演出，當時她不感到害怕：「因為知道問題可以解決。」
胡子彤懶醒幫Chantel解圍
提到胡子彤在台上只擁抱張蔓莎與張蔓姿，但未有攬Chantel，他即伸出「紳士手」隔空扮搭Chantel肩膊影相。他解釋早已認識張蔓莎、張蔓姿，與Chantel不是太熟：「之前Chantel忙完綵排舞台劇，再嚟綵排音樂會，我唔想講太多嘢騷擾佢，想畀佢有更多時間休息同專心綵排。如果下次再有機會同Chantel見面做嘢，會衝過去打完招呼，跟住好有禮貌咁擁抱佢。」Chantel則表示眼瞓到不懂反應：「平時返屋企會不停練歌同聽歌，搞到自己明明可以早瞓，但就好夜都未瞓。」
問她是否反叛不睡覺？胡子彤即為Chantel解圍，指她為了做騷才做準備。問他為何幫Chantel解釋？他笑言：「我都係估吓。」不過Chantel說：「我聽啲歌同呢個騷唔關事。」胡子彤即尷尬笑稱自己估錯。
