林德信着衫注重彈性

  「新手爸爸」林德信近來搞作多多,除了忙音樂創作外,近日抽空為服飾品牌拍攝廣告。廣告中,林德信穿上極具彈性的恤衫做瑜伽,又陶醉彈結他。林德信笑言已習慣湊女,穿有彈性的衣服最方便:「以前揀衫最緊要係好睇,實用衫唔多嘅。依家揀衫就要多埋『彈性』,因為有時抱囡囡佢會扭嚟扭去,有彈性嘅衫就方便照顧佢!同佢玩『飛高』、俾佢嗲真係好有滿足感,即使工作幾忙碌都好,只要湊住佢,咩煩惱都會唔記得晒!」