BIG FOUR「醇」友誼 發放正能量
重金禮聘「星級組合」拍演唱會海報
由張衞健（Dicky）、許志安、蘇永康和梁漢文（Edmond）組成的BIG FOUR，將於8月9至11日在紅館開騷，他們相隔12年合體再踏紅館舞台，演唱會海報重金禮聘鬼才林海峰（Jan）擔任創意大腦，星級攝影師夏永康親自操刀，捕捉BIG FOUR最型一面，以及凸顯他們超過30年的友情，化作正能量傳播出去。
張衞健表示「BIG FOUR」由林海峰命名：「我哋第一張演唱會海報，4個人咬住支玫瑰花嗰張，就係Jan幫我哋做。好開心今次我哋三顧草廬，邀請到佢出山。」Jan幽默回應：「嗰次演唱會係2010年，即係隔咗15年先至有第二個Job，都算係咁，我終於發市！」2013年BIG FOUR舉行第2次紅館騷，至今相隔12年。
Dicky認長輩：牽牛上樹有啲難
身為時裝達人的蘇永康，被問有否為3位拍檔設計造型？他說：「都要問過Jan先！好開心又再同大家襯衫襯飾物。（好困難？）困難喺我度，我依家嘅Size畀唔到佢哋用，除咗啲披肩圍巾。（要加拐杖、護㬹、護膝？）好彩仲未需要！」
拍攝海報期間，播放多首有關友情的歌曲，Jan笑言：「最初揀咗《監獄風雲》首歌《友誼之光》，諗住播呢啲歌幫佢哋帶入情緒，後嚟發覺都唔需要，佢哋4個好快就好自然咁入咗嗰個氛圍，呢個就係大家都好想喺台上見到佢哋嘅感覺。尤其Dicky，佢好清楚我想大家表達乜嘢，一直帶住大家，始終年紀最大。」Dicky說：「長輩嘛！牽牛上樹係有啲難度，仲要係3隻牛，但係佢哋都聽話。」
相隔12年，各人除了成家立室，蘇永康更榮升父親，問到開騷如何湊仔？他說：「輪到佢就番我一次啦！囝囝自出生開始，成日見到呢3位叔叔，又分別睇過佢哋唱歌，但未見過我哋4個同台表演。」Edmond爆料：「佢成日逼個仔睇㗎！」你一言我一語，充滿笑聲。Dicky說：「BIG FOUR走埋一齊，自自然然就會帶到快樂畀大家。經過咁多年之後，希望今次除咗快樂，大家有更多得着。」Jan以醇酒形容他們的友誼和情懷。
