吳若希唔夠喉 想開世界巡唱
好友見證澳門演唱會圓滿結束
吳若希（Jinny）日前在澳門舉行演唱會，圈中不少好友專程過大海捧場，包括曾與她割席的麥美恩。她最感動是見到一班一齊成長的好友，又稱今次演出未夠喉，希望到世界各地開騷，讓更多人看到她努力付出的成果。
「吳若希《Gossip of Me》演唱會」日前圓滿結束，全場爆滿，好友胡鴻鈞、周奕瑋、朱敏瀚、戴祖儀等均專程往澳門捧場，早前與Jinny割席後極速破冰的麥美恩亦有到場睇騷，更走到台前獻花。完騷後，她到後台跟Jinny合照，看來兩人已沒芥蒂。
Jinny跳唱《炊煙》為演唱會揭開序幕，她說：「入行15年，呢次係我第一次喺澳門開騷，心情緊張又興奮，喺呢15年有好多我嘅流言蜚語，工作、感情、家庭，好多好多，今晚我會畀大家睇清楚最真實嘅吳若希。」
擔任特別嘉賓的詹天文獻唱《一切都是有原因的》和《大雕刻家》，她說：「好開心可以做Jinny姐姐嘅演唱會嘉賓，祝大家端午節快樂，大家食咗糉未？」之後Jinny回到台上唱歌，期間有粉絲送上生日蛋糕，補祝偶像33歲生日，並賀她入行15周年。最後她跟全場大合唱《越難越愛》，為演唱會畫上句號。
排舞辛苦嗌救命
Jinny完騷後受訪時表示：「因為開騷前有兩三日失咗聲，所以今日係上天送畀我嘅禮物，尋日把聲終於開番。」她坦言希望舉行巡唱，到內地甚至美加：「畀多啲人見證我嘅努力，因為排舞排得好辛苦，好想喊呀，救命呀！我畀自己跳舞98分，因為已經盡晒能力，當然我覺得有一啲位同甫士可以做得更好。」她坦言最感動是見到一班一齊成長的朋友：「我唱《感激能夠跟你遇見》時控制唔到眼淚，就係因為有呢班朋友陪住我成長，成就咗我，所以嗰一刻忍唔住喊。」
