姜濤許一世承諾「MIRROR唔會散」
求其噏剩3年合約
男團MIRROR人氣王姜濤早前於節目中自爆與ViuTV只剩3年合約，事後隊長楊樂文（Lokman）更稱若有成員退團，MIRROR必定解散！前晚姜濤出席活動時笑言「只剩3年合約」只是隨意講，不清楚真正合約期，並指無論續約與否，MIRROR一定不會解散：「係一生一世！」
《第七屆 KKBOX 香港風雲榜》前晚在亞洲國際博覽館舉行，陳凱詠（Jace）和洪嘉豪擔任主持。出席歌手包括姜濤、盧瀚霆（Anson Lo）、呂爵安（Edan）、李駿傑（Jeremy）、邱傲然（Tiger）、張天賦（MC）、周殷廷、黃妍等。
提到姜濤早前於ViuTV節目《呂濤米Lo Seoul》自爆剩3年合約，他說：「我係隨意講下，當時都可以講5年或10年，真係冇好認真去諗呢件事，冇諗過俾人放大。我唔記得簽咗幾多年，只記得幾多歲開始簽，當時仲後生，冇乜理呢啲嘢，有得簽就簽，返去確實咗再話畀大家聽。」對於Lokman表示若有隊友不續約，MIRROR必定解散，姜濤不認同說：「MIRROR唔會散，就算我哋人唔喺度，個心都喺度，我想永遠都一齊。無論續唔續約都好，我哋12個都可以得閒一齊出嚟食飯傾偈，係一生一世！」
Jeremy被批40歲遇真愛
節目中，姜濤與經理人黃慧君（花姐）深入對談，對負面新聞表現豁達，姜濤表示人愈大愈成熟：「經歷多咗就會更加識處理，好多言論唔係自己控制到，做好自己分內事就夠。情緒好難成熟，但如果有情緒，態度要點樣展現出嚟都係一個課題。」
Jeremy透露曾找堪輿學家算命，被批31歲至33歲會遇到心儀對象，但最終有緣無分，要到40歲才出現真愛：「我個人太『摺』，或者錯過咗都唔知，性格決定緣分，可能天跌落嚟，我又未必承受到，就要等到40歲。」
