軒仔爆林峯有「玩凳癮」
林峯前晚於紅館舉行第6場演唱會，與表演嘉賓張敬軒合唱《馴獸師之王》，全場觀眾興奮尖叫。阿峯表示：「大家應該唔知我同軒仔嘅熟落程度。」軒仔說：「我同阿峯第一個交集，就係佢係我前輩。」引得全場大笑。軒仔再爆料：「我應該係少數……講唔講得㗎？半夜上過你屋企嘅人。」兩人之前屬同一唱片公司，早於十多年前結緣，軒仔笑指阿峯當年已愛玩凳，阿峯解釋只是鍾情傢俬，軒仔說：「我以前上你屋企坐過你啲凳，你喺啲凳度做過啲乜？」阿峯笑言：「咁我屋企啲凳的確比梳化多。」
經過一輪搞笑互動後，軒仔向阿峯送禮，先是送上「林峯嘅腰封」，之後更拿出為阿峯特別調製的「軒公活絡油」，林峯即向軒仔贈送「飛鷹」回禮。原來軒仔病了幾天，仍堅持到場撐阿峯，之後唱出代表作《櫻花樹下》贏盡掌聲。
