伍允龍打機撻着 認戀李蔓瑩
Dry足10年終脫單
47歲武打明星伍允龍曾與鍾嘉欣有過一段地下情，兩人2007年開始交往，至2015年分手，之後伍允龍單身至今。昨日伍允龍宣布脫單，承認與34歲「宅男女神」李蔓瑩拍拖，據知兩人同樣熱愛打機，因而擦出愛火花！
伍允龍一向形象健康，自從與鍾嘉欣分手後都未有再公開新戀情。之後他拍無綫劇《城寨英雄》與劉佩玥傳緋聞，但最後不了了之。專注事業發展的伍允龍終憑《九龍城寨之圍城》「王九」一角打出名堂，他曾透露擇偶條件：「如果女仔鍾意打機會加分。」
早前他被拍得與一名女子同遊迪士尼，雖然女方戴口罩，未能看清樣貌，但兩人狀甚親暱。之後伍允龍出席活動時承認陪女方去玩，記者追問是否「戀人未滿，友達以上」，他避談說：「中文好深，唔係幾明。」不過當時他自爆前日會入場欣賞林峯演唱會，問到會否帶女伴睇騷？他說：「睇吓點啦！」
「畀多啲時間空間我哋」
前晚伍允龍現身紅館觀眾席，女伴是「宅男女神」李蔓瑩（Renee）。兩人全程言談甚歡，Renee更情深望着伍允龍，頻頻被他氹得大笑，儼如熱戀中的情侶。其實兩人已非首次一齊睇騷，上月謝霆鋒在啟德舉行演唱會，兩人被拍得一齊離場。雖然伍允龍與Renee看似大纜扯唔埋，但據知伍允龍拍打機片，需要找一位熱愛打機的女士，於是透過中間人認識Renee，兩人志趣相投，一拍即合。
戀情曝光後，伍允龍昨日大方認愛，承認之前與Renee同遊迪士尼：「各位傳媒朋友大家好，好多謝大家最近嘅關心，尋晚同我一齊出席演唱會嘅，係我女朋友Renee，亦都係較早前一齊去迪士尼玩嘅朋友，最近透過朋友介紹認識開始拍拖，希望嚟緊大家都畀多啲時間同空間我哋，多謝大家！」
