哭訴曼聯日子 安東尼：試過幾日無食飯
曼聯巴西翼鋒安東尼，今年一月外借貝迪斯大翻身！短短4個月已經為球隊在各項賽事，貢獻9個入球及5個助攻，成為當地球迷寵兒。安東尼於歐協聯準決賽對費倫天拿更成為關鍵先生，兩回合賽事都取得入球，並在次回合加時交出靚助攻，造就艾薩蘇利奠勝。剛於西甲煞科戰對華倫西亞亦射入精彩世界波，成為西甲最後一輪的最佳入球，完全重拾最佳狀態。巴西新帥安察洛堤剛上任，就立即重召他歸隊，好事接踵而來。
安東尼在今場決賽前，接受訪問時卻難掩激情，哭訴在曼聯的苦日子：「踢曼聯時，我經歷艱難時期，嗰陣我完全搵唔到踢波嘅樂趣，我甚至同我哥哥講，我捱唔到落去！」安東尼淚流滿面地說：「我返到屋企，根本冇心情同力氣陪個仔玩，甚至試過連續幾日冇食飯，將自己鎖喺房間入面。就係因為咁，我感謝上帝，喺屋企人幫助下，我捱過咗，依家嚟到貝迪斯，簡直係上咗天堂，過得好開心！」安東尼表明極希望留在貝迪斯，並不打算重返英格蘭踢波。
