小方開支大 唔敢推Job
打理新游泳學校 親自洗廁所
方力申（小方）結婚後非常勤力，除了忙於打理新的游泳學校，又將會參加游泳錦標賽，以及到內地工作。他坦言新的游泳學校每月開支要數十萬元，必須比以前更加努力工作。
方力申、張家朗、楊文蔚、歐鎧淳、陳安立昨日出席HUAWEI創新產品發布會，小方表示與張家朗很久沒見，對上一次見面是東京奧運，見證對方奪奧運第一金：「當時除咗做訪問，仲搵佢攞簽名，相信我係張家朗奪金後第一個得到佢簽名嘅粉絲，個簽名依家放喺屋企珍藏。」
小方透露現時正忙於打理新的游泳學校，事事親力親為：「就連洗廁所都親自去做。」他很開心有一個能24小時練水的地方，又稱8月將到新加坡參加世界先進游泳錦標賽：「依家我半夜都可以練水。」不過比賽期間他要到內地工作，相當忙碌：「我首先會參加200米背泳，之後去工作，然後再返去參加另一組別嘅比賽。（點解唔推咗工作專心比賽？）唔得，依家結咗婚，手停口停，不過太太冇出聲，反而係我媽咪寧願我唔比賽，叫我要搵多啲錢。上年同一個比賽，我攞咗世界第二，但最近好忙，未必Keep到第二。其實我第二第三都攞過，就係未攞過第一。我都要教育學生，比賽係求進步，唔係求獎牌，但我都去到呢個年紀，已經冇得再進步，就唯有求獎牌。」
小時候與太太住同一屋苑
小方坦言新的游泳學校每月開支要數十萬元，故要更努力工作，太太有幫手處理文書工作。他自爆與太太很有緣，原來小時候住在同一屋苑：「佢係喺屋苑學游水，我都有學過，原來我哋以前住嘅地方只係隔幾座，有可能曾經擦身而過，要睇吓啲舊相會唔會搵到痕跡。」
張家朗被挑機冇認輸
張家朗談及早前被ViuTV劇《哪一天我們會紅》的許軼（Day）以激光劍「挑機」趣事，他表示劇集播映時正在比賽，加上時差關係令他未能及時回應：「都覺得意外同開心，愈來愈多人留意運動員係好事，不過我冇認輸。」問到會否作幕前演出？他表示要視乎時間及是否適合自己，如各方面都配合可以一試。
