COLLAR暴走 化身茶記女神
新團歌Sell本土風
由Marf（邱彥筒）、Gao（沈貞巧）、Day（許軼）、Candy（王家晴）、Winka（陳泳伽）、Ivy（蘇雅琳）及Sumling（李芯駖）組成的女團COLLAR，前日推出年度第2首團歌《暴走女團》，今次歌曲MV以茶樓和冰室為主題，大玩本土風，亦是繼上一首團歌《Trouble Trouble》後再次展現COLLAR玩味一面。
《暴走女團》是COLLAR成軍以來首支以中文歌名命名的團歌，Marf表示：「今次最有趣係選擇咗好多港式風味嘅嘢去做主題，之前我哋歌曲比較科幻，例如《idc》、《Call My Name！》都係比較科幻元素，《Speak Love》就係戀愛元素，但就未試過本土元素，我哋作為本土女團，應該要試啲本土嘢。」
Day金髮造型衝擊視覺
為展現本土元素，除了到茶樓和冰室拍MV，COLLAR更以「茶記」造型上陣，Gao說：「今次造型師好大膽，竟然搵咗件茶記衫畀我哋，上面寫住『領女冰室』，係專屬我哋嘅茶記衫，好特別，唔一定着到靚靚咁，估唔到茶記衫都可以玩到女團風。」
提到「暴走」兩字，COLLAR可有「暴走」趣事與大家分享？Candy笑言：「朝早6點起身同朋友去一間好出名嘅冰室食早餐，食完即刻衝返屋企上Zoom堂，6點起身就係為咗同朋友食早餐，好深刻。不過都四五年前，未試過咁早起身為咗食早餐。」芯駖則說：「見到小昆蟲，尤其黑色好多隻腳，我會暴走，試過食食吓嘢見到，真係會好驚。」Day自言向來優雅，最「暴走」是今次拍MV的造型：「大家都冇見過我金髮，見到時嘩一聲問邊個嚟，我嘅暴走就係衝擊大家視覺。」
