鄭秀文 王丹妮向梅姐致敬
合唱《壞女孩》別具意義
當年王丹妮（Louise）演出電影《梅艷芳》獲鄭秀文（Sammi）支持和鼓勵而結緣，前晚Louise獲邀在Sammi澳門演唱會擔任嘉賓，兩人默契十足唱梅艷芳經典名曲《壞女孩》，向偶像梅姐作出無限敬意！
王丹妮非常感謝鄭秀文提攜，難掩興奮說：「雖然之前試過喺電影舞台上唱歌，但今次係以自己個人身份踏上舞台同Sammi合唱，心情實在無比興奮。因為我同屋企人都係Sammi粉絲，所以受到Sammi邀請真係好驚喜、好榮幸。《壞女孩》呢首歌係Sammi親自揀嘅，能夠同Sammi一齊唱梅姐嘅歌我覺得特別有意義，深深感受到我哋對梅姐嘅敬愛。」之後Louise獨唱Sammi另一首名曲《理想對象》，她說：「呢首歌係我親自揀嘅，因為除咗我之外，我知道好多歌迷都視Sammi為理想對象，所以我唱出大家嘅心聲。」
Louise專誠搵唱歌老師練歌
向來工作認真的Louise為了今次表演，專誠找唱歌老師練歌，希望在台上發揮得更好。她不時提醒自己表演時別太緊張，盡情跟Sammi一齊Enjoy舞台。最令Louise開心是Sammi竟百忙抽空與她排練·她說：「Sammi已經夠忙，但願意抽時間同我一齊多次綵排，務求令到表演更合拍、更有Feel。作為後輩嘅我真係覺得Sammi非常勤力，追求表演盡善盡美，仲好提攜後輩，畀我哋有多啲表演經驗。呢種精神好值得學習，Respect！我希望將來有機會同Sammi一齊拍電影。」
表演完畢，Sammi在後台讚Louise演出淡定，又很有台型。Louise則稱此行除了老公羅孝勇和囡囡同行外，老爺和奶奶更專程由澳洲到澳門睇騷，因他們全家都是Sammi的忠實粉絲。
