靚靚想再生B 老公一句打沉
自認開通阿媽 教囝囝氹女仔
影后袁詠儀於馬來西亞電影《OMG！阿媽有喜》飾演高齡產婦，她笑言若真的發生也沒所謂，並自爆50歲前想生第2胎，但老公張智霖一句「你唔記得當年申請學校幾難咩」，令她打消念頭。
相比香港拍攝節奏快，靚靚直言拍大馬電影感覺很Chill，導演清楚拍攝流程，演員又有準備，不會浪費時間在劇本上，只集中現場走位，希望拍出更多變化，其餘時間則不停吃。作為唯一香港演員，靚靚坦言初期不適應對白節奏，戲中女兒黃潔琪（Miko ）要跟她鬧交，駁嘴都不能慢，要令阿媽冇機會鬧她。
Miko讚靚靚要求高
問Miko覺得靚靚為人如何？她說：「拍之前見靚靚姐是勁緊張，驚自己不停食螺絲，但第一日拍就反而唔驚，因為大家有走位，所以NG好少。」問到靚靚是否很嚴格？Miko表示只是要求高，靚靚稱：「大家第一二日先熟，要習慣節奏同氣氛。」問Miko又如何打破隔膜？她笑言是靚靚姐主動「破冰」讓拍攝順利。靚靚笑言：「唔好講到我咁惡啦！」
談及若靚靚現時懷孕屬高齡產婦，她笑言：「我唔介意，我鍾意小朋友，但呢個年紀需要周全計劃，養育責任重大。我個仔18歲，我都同佢講之後嘅人生要自己走。若果我依家有小朋友，我都希望陪小朋友到18歲。」問到有否跟老公談這個話題？她笑言：「你知張生好『佛系』、隨緣。其實我50歲前好想要二胎，但老公一句『你唔記得當年申請學校幾難咩？』呢句令我打消念頭，無奈個天覺得你照顧一條友就夠！」
對於「魔童」的戀愛問題，她表示：「我唔反對佢戀愛，佢已問我女仔點解忽冷忽熱，我乘機教佢要理解女仔嘅情緒變化，要慢慢講同氹。」提到「魔童」已成年，她有機會很快抱孫，靚靚幽默說：「我老公都咁講，我就叫阿仔睇多啲世界，唔好太早畀承諾。做咗父母有好多嘢負責，唔係講囉！過多幾年先，但當然唔希望成30歲先至生，因為我驚我唔夠力湊孫，不過佢畀我湊就湊，唔畀就玩囉！」
