成員若不續約 MIRROR必解散
姜濤3年後約滿ViuTV
早前MIRROR「人氣王」姜濤於節目自爆3年後約滿ViuTV，昨日隊友Lokman出席活動時表示若有人不續約，MIRROR必定解散，AK則稱要視乎公司誠意，才決定是否續約。
人氣男團MIRROR「夜粥小組」楊樂文（Lokman）、江𤒹生（Anson Kong，AK）、王智德（Alton）與陳瑞輝（Frankie）昨日到旺角和尖沙咀進行花車巡遊，宣傳下月舉行的演唱會，吸引逾200粉絲應援。他們在旺角落車派Postcard時，粉絲爭先恐後引起混亂，遭商場投訴，粉絲追車時更險象環生！
「夜粥小組」表示演唱會暫時開一場，會否加場要視乎反應。提到姜濤早前一時口快自爆3年後約滿，AK表示：「份份約都有期限，實際數字係幾多我哋就唔講。到時候真係完約，大家一定會知道。我哋唔會秘密解散，到時MIRROR有啲咩去向，一定會同大家講。」Lokman則說：「無論3年定30年，人總需要勇敢生存，路一定要走。（如果有成員唔續約，擔唔擔心MIRROR解散？）唔續約就一定會散，我覺得各人有各人嘅方向，各人行咩方向，我哋各人都會支持。」
AK視乎公司誠意
AK表示如何走下去就要看公司誠意：「誠意係好需要成本，僱主同員工嘅一個協調。（咁公司過去誠意係點？）當日我只係一個黃毛小子，嗰時嘅概念同埋物價會升值，唔可以用嗰時嘅時間、感情去計。我哋未傾到去呢個階段，所以無可奉告，依家只係專心做演唱會。」
提到Lokman與Alton經營的食肆結業，Lokman透露現時只剩服裝生意：「食肆生意結業唔會影響信心，但會影響小心，以後會諗多幾步再行一步。」他覺得做生意難免要交學費，不可能一步登天。問到會否再做食肆生意？他說：「經過呢兩次，暫時唔會搞，學多啲、了解多啲先。」Alton亦指暫時沒計劃再開食肆，待市況好轉才再作打算：「不過經營食肆係我嘅心願。」
