西維爾 彭馬斯護級大混戰
紙紮防線 入埋唔夠輸
西甲第36輪上演護級激戰，第16位西維爾主場對第19位拉斯彭馬斯。在今輪之前，尾二拉斯彭馬斯落後尾四艾拉維斯3分，餘下僅3輪已無退路，即使作客亦要搶攻力爭3分；西維爾只領先尾三雷加利斯4分亦未上岸，加上近8場聯賽2和6負衰到貼地，主場遇弱亦必須傾力求勝。兩軍防線同樣不濟，焗攻隨時暴露更多空間予對手反擊，投注首選﹝2.5﹞大盤。（NOW 632台周三3:30am直播）
曾經7奪歐霸冠軍的西維爾，正經歷近年最失敗球季，近兩個多月來合共只搶過兩分，根本無法交代。球隊近期在陣上表現並非缺乏鬥志，上任僅一個月的69歲新教頭卡柏路斯深明球隊處境，踏入本月的比賽明顯加強進攻意識，全力求勝！只可惜防線太差令連番努力白費，前仗主場面對尾三的雷加利斯，西維爾基本上由頭攻到尾，全場共創造25次射門，不過即使傑基沙拉斯及伊薩羅美路先後破關，但防線仍無法守住領先優勢，只能賽和2:2；上輪作客切爾達基於對手半場已踢少個，同樣壓住對手狂攻，亦同樣攻入兩球，但結果卻輸波而回。今仗續有主力中堅尼安素及最強防中迪積比爾蘇維因傷缺陣，主場遇弱肯定急於搶攻，但防線同樣容易輸反擊。
尾二拉斯彭馬斯 水浸眼眉
拉斯彭馬斯今季升上西甲，季初已經以進攻足球令人眼前一亮，首循環主場2:2和西維爾、2:3負畢爾包及作客3:2贏華倫西亞，不論勝負都贏得各方好評。不過踏入今年初卻因傷兵問題，成績與表現每況愈下，連續12輪聯賽不勝只得4分，導致淪落護級深淵。不過該隊近期傷兵問題終於過去，上月曾接連贏過基達菲及馬體會，一度重現生機，不過近期又3連敗，尤其防線演出極差，前仗主場對華倫西亞在形勢一面倒佔優下輸2:3。現時排尾二水浸眼眉，形勢上非勝不可，難得遇上狀態近績同樣差的西維爾，隨時重演首循環2:2大混戰。
