首次做劇集男一 朱敏瀚自資谷劇
朱敏瀚、張馳豪與袁文傑等昨日到商場宣傳無綫熱播劇《虛擬情人》，朱敏瀚透露劇集進入結局周，要改變宣傳策略：「我做咗一個幾瘋狂嘅宣傳方式，就係搵圈中好友拍短片，最難忘去大馬搵張振朗，但只係十幾秒嘅片。」他又稱將會推出與王敏奕合拍的MV，多謝忙拍《新聞女王2》的王敏奕抽出10分鐘拍攝：「冇辦法，今次自己首次做男主角，好多安排都係自己出錢。我覺得依家要多方位宣傳，唔能夠坐喺度等收視。」
提到張馳豪好友姚焯菲與MIRROR成員合演音樂劇，問他想不想與COLLAR成員合作？他說：「邊個都想，因為大家都係有才華嘅藝人，多啲Crossover對行業都係好事。 」
