宇佐美生日當旺 飛腳唔怕紅鑽
日職第15輪今午有直播，次席浦和紅鑽主場迎戰第10位大阪飛腳。兩軍目前都處於佳態，尤其紅鑽已保持聯賽5連勝，但近兩仗遇弱只能小勝。飛腳平均人腳不在主隊之下，近期亦全面回勇，加上今日正是王牌球星宇佐美貴史33歲生日，全隊上下都揚言以勝仗獻給他們的偶像隊長。紅鑽主場只小讓平半信心不足，撐飛腳下盤。（myTV Super周二1:00pm直播）
宇佐美貴史是飛腳最值得自豪的青訓產品，這位前日本國腳前鋒曾外流德甲，効力過拜仁慕尼黑、賀芬咸、奧格斯堡等勁旅，回流日職後一直為母會飛腳効力。上季仍以12個入球成為球隊首席射手，近期對京都不死鳥亦為球隊先開紀錄。記得宇佐美貴史去年生日當天，一箭定江山幫助飛腳在大阪打吡擊敗櫻花，前年對紅鑽亦為球隊先開紀錄。飛腳上季作客紅鑽亦能贏波，近期兩連勝共入6球，全面回勇下，再遇紅鑽有力坐和望贏。
