領隊史諾 帶頭唱「高普之歌」
超越曼聯 紅軍英倫之王
利物浦昨晨主場5:1大炒熱刺，拋離次席阿仙奴15分之多，提前4輪贏得今屆英超冠軍，亦令紅軍在史上英格蘭頂級聯賽冠軍數目增至20次，追平曼聯紀錄。不過連同各項賽事，紅軍已累積69個冠軍，超越曼聯的68個，榮登英倫之王！
紅軍今場只需要取得一分，即可確保提前封王。不料開賽初段被倒戈的熱刺前鋒蘇蘭基頂破大門，不過路易斯戴亞斯迅即為利物浦扳平，然後麥亞里士打及加普分別建功，助利物浦半場已反先3:1。沙拿下半場錦上添花，加上熱刺烏度治擺烏龍，湊成5:1大勝。紅軍取得球會隊史第69個冠軍，雖然曼聯若能於今季較後時間的歐霸盃奪冠，錦標數字會再次追平，但紅軍曾6度在最重要的歐聯封王，比曼聯多3次。難怪一向支持紅魔的曼聯名宿加利尼維爾，賽後亦公開投降：「利物浦擁有更多歐聯冠軍，依家聯賽錦標亦一樣，就算我覺得心酸，但都要承認今日之後，利物浦已經係英格蘭最大球會。」
今季帶領紅軍的荷蘭領隊史諾，與上任領隊高普相親相愛！在史諾上任時，高普呼籲球迷高唱史諾名字，將對他的支持轉向史諾；昨晨紅軍封王，史諾亦帶頭與球迷一聲高唱有高普名字的歌曲！史諾賽後說：「感覺好正，我唔想講太多，唯一想講係多謝高普！今季好多時候都有同佢聯絡，佢留低咗一隊足以奪冠嘅球隊畀我！」
紅軍王牌前鋒沙拿，賽後不斷用場邊球迷手機一起自拍，沙拿說：「我哋上次贏得冠軍係2020年，當時球迷因為疫情未能入場一齊慶祝，今日當然要補番數！上次我同高普、費明奴、文尼一齊贏冠軍，依家佢哋已經離開咗，好開心我仍然可以做得到！」
哥迪奧拿 第一時間祝賀
在這場英超比賽的同時，上屆冠軍曼城於英足盃準決賽2:0擊敗諾定咸森林，將於下月與水晶宮爭奪獎盃。不過領隊哥迪奧拿賽後未有興奮慶祝，並在記者會上第一時間說：「記者會之前，首先我要代表我自己同曼城全體，祝賀利物浦贏得英超冠軍，佢哋今季實至名歸！不過曼城下季會捲土重來，向佢哋發起挑戰！」
