安歷基：PSG再訪酋長大變身
巴黎聖日耳門去年10月曾作客0:2不敵阿仙奴，今仗四強戰再度到訪酋長球場，教練安歷基（圓圖）表明會有新的作戰計劃：「我好清楚阿仙奴，佢哋無球在腳係最好球隊，我哋會以截然不同嘅面貌去倫敦，甚至會做一啲阿仙奴從未見過嘅事情，唔會再重複犯上次錯誤！」
PSG上次對阿仙奴佔有65%控球時間，但全場埋門機會卻遠遜對手，結果被夏維斯及布卡約沙卡先後攻破大門。不過安歷基相信今次情況可以逆轉：「我哋作客利物浦同維拉時，場上對抗同速度都已經有進步，今仗喺陣容上唔會有好大唔同，但我哋會主動迫搶，而且會加快速度，唔會再跌落阿仙奴領隊阿迪達嘅狡猾圈套！」PSG剛剛於法甲主場1:3不敵尼斯，痛失聯賽不敗身，而且令人意外地排出強陣輸波，安歷基說：「我哋全場有接近30次攻門，只係對方門將太出色！至於點解唔收起主力球員？我唔想解釋，留番畀大家同阿迪達去解讀啦！」
