祖兒漏口風 阿Sa翻撻前度
Minnie期待入馬場睇賽事
天后容祖兒與韓國女團（G）I-DLE成員Minnie等昨日到沙田馬場擔任「富衛保險冠軍賽馬日」表演嘉賓，祖兒被問好姊妹蔡卓妍（阿Sa）是否與「百億麻雀館太子爺」石恆聰復合時，起初她稱只是聽聞，但隨後又漏口風指兩人很有默契：「否則唔會翻撻！」無意間踢爆兩人舊情復熾。
容祖兒透露去年看過（G）I-DLE的演唱會，當時有跟Minnie在後台合照，今次很開心同場演出。提到日前她與英皇師弟妹一齊睇謝霆鋒的演唱會，祖兒笑言原本想趁休息好好養聲，但睇騷時太興奮，忘形大唱大叫：「我送咗條聲帶畀霆鋒。（阿Sa都睇得好開心同投入。）佢係我睇騷『鐵腳』。（阿Sa係咪同石恆聰復合，所以心情咁靚？）我有聽聞，但冇親眼目睹，希望佢開心。（你冇問佢？）我唔八卦，如果佢想講，佢自己自然會講。（怕佢問番你？）我有乜好講？我嘅嘢佢都知。」不過祖兒不小心漏口風，她說：「佢哋之間咁多年嘅相處模式，唔單止係甜蜜，而且好有默契，否則都唔會翻撻，希望佢哋好好一齊生活。」
Minnie受訪時表示首次踏足馬場，心情緊張又激動，很期待觀看賽事。她表示知道很多粉絲一早到場支持自己，很享受整個演出。提到跟祖兒同場演出，她表示曾在演唱會翻唱對方的《我的驕傲》：「我好鍾意呢首歌，今次好榮幸可以同佢同場。」工作方面，她透露下月推出新專輯，花了很多時間籌備，並指新專輯非常特別，叫大家好好期待。
小方否認有喜事宣布
同場的方力申（小方）早前在廣州開騷，但太太Maple未有同行，問到是否有好消息宣布？他笑言：「唔係，佢唔舒服，佢比較弱，你哋唔好咁Chur。（父母恨抱孫？）恨！記得我哋喺美國返嚟斟茶畀父母，我爸爸講咗句傳宗接代，早生貴子。後來我同太太臨出門口，Maple講咗句『爸爸，我哋走先喇』，我爸爸露出好燦爛嘅笑容，係我十幾年冇見過，我會記一世。」
