心痛明禎受委屈 Edan：盡力保護佢
曾被惡意留言導致迷失
呂爵安（Edan）日前深夜開直播與粉絲傾偈，真情剖白指緋聞女友林明禎對他很重要。昨日他出席活動時坦言想尋回昔日「有嗰句講嗰句」的自己，不會再在意外界的聲音，並心痛明禎遭網民惡意攻擊，會盡能力保護對方。
MIRROR成員姜濤、盧瀚霆（Anson Lo）、呂爵安（Edan）與李駿傑（Jeremy）昨日到觀塘apm宣傳ViuTV節目《呂濤米Lo Seoul》。提到Edan日前於直播真情剖白，承認林明禎對他很重要，問到做直播前有否通知公司？他表示因為太久沒做直播：「做直播係我同『爵屎』（粉絲暱稱）溝通方法之一，我想做番自己、想搵番以前輕鬆嘅Edan，想搵番嗰個咩都唔驚、亂講嘢、做自己認為啱嘅嘢嘅Edan，所以係時候踏出呢步。」並感謝「爵屎」不離不棄。
他於直播稱「意識到會失去啲嘢」，問到是否指因緋聞而失去工作？Edan笑言：「係驚！你問有冇失去啲嘢，點都會有。我日日都失去啲嘢，頭髮、骨膠原，覺得唔需要太理會外界。」對於不時收到網民攻擊性的私訊，他坦言無數次想回覆：「我會提到明禎，係因為自從公開追佢後，一直都有好多聲音、好多惡意，我係俾呢啲聲音導致好迷失！佢一個女仔要承受呢啲嘢，我覺得好唔易，某程度上係因為我令佢咁，所以我都覺得好唔好意思，一直都諗有咩方法可以保護佢。以前我驚，但有時我避而不談又引起其他人誤會，既然講又會寫，唔講又寫，不如勇敢啲表達，盡我能力保護佢，想話畀大家知佢係好女仔，佢對我真係好緊要。喺我唔開心呢段日子，佢幫我好多。」
姜濤唔覺搶熊貓風頭
問到林明禎可有向他表示受委屈？Edan：「我都收到咁多惡意私訊，佢亦一定收到唔少！我唔奢望直播後會改變啲乜，但表達自己嘅想法係最重要。」
至於姜濤日前到主題公園出席活動時，被拍得工作人員講解時，他在旁稱「好想瞓覺」，被網民指不尊重場合。他解釋：「因為當時講緊熊貓好鍾意瞓覺，我哋見佢（熊貓）都瞓緊，見到佢瞓我又想瞓。我以後唔講喇，對唔住！所以今日都冇打喊露。以後講相反『精神』，我依家好精神。」對於被指搶去熊貓風頭，姜濤驚訝說：「呢個都有得講？對唔住囉！我都唔會搶到鏡，嗰日見啲人淨係影熊貓。」
