生育Hold住先 衛詩雅再迎高峰
盼陳茂賢奪金像獎最佳導演
衛詩雅入行17年，演員身份卻多年來未受肯定，直至她遇上《破·地獄》內向堅忍的郭文玥角色，與許冠文的父女情令觀眾動容及大獲好評，為她贏得5個影后殊榮，並入圍香港電影金像獎「最佳女主角」。衛詩雅希望在各方面繼續努力做得更好，迎接人生另一個高峰。
採訪：記者 阿祖 攝影：記者 黃艾力
衛詩雅有份角逐今屆金像獎影后，頒獎典禮日漸逼近，她坦言心情緊張，但不及去年憑《不日成婚2》首次提名般緊張：「今年係有少少處於已經接受任何結果，我腦海不斷對自己講如果得獎會好開心，但仍要保持謙卑，攞唔到當然會有少少失望啦，但都要提自己唔可以太唔開心，要檢討仲有乜嘢不足，所以一直訓練自己。」去年她首獲提名影后被指陪跑，今年卻憑《破·地獄》成為大熱，更已奪得5個影后殊榮，問到會否信心大增？她表示：「信心都係差唔多，因為係五分一機會。我記得提名名單揭曉後，都有同其他最佳女主角入圍者互傳短訊恭賀。」
提到《破·地獄》囊括金像獎18項提名，平了2009年《十月圍城》創下的提名紀錄，問衛詩雅最想哪個獎項得獎？她說：「最想導演陳茂賢攞導演或編劇獎，因為我同佢關係好似屋企人，之前我哋通電話，回顧大家相識時都係喺最辛苦嘅狀態，當時大家都冇乜機會。我哋同步捱出嚟，當時大家會諗有啲咩計劃可以做，會講夢想，到依家可以一齊獲提名，所以感覺好夢幻，好想見證佢攞獎一刻。」她亦希望許冠文得獎：「因為『爸爸』得獎意義都好大，佢係好好嘅前輩，記得喺我婚禮舉行前3日，大家仲一齊做訪問，我哋坐喺一邊時，佢同我分享做爸爸嘅感受，佢話唔捨得個女，又講兩個人點解可以結婚，仲送錦囊畀我，叫我要記住全世界最錫你嘅男人只會係你嘅爸爸，佢講嗰陣眼濕濕，我又聽到眼濕濕，感覺真係有少少似我爸爸，所以佢攞獎又係一個雙重意義。」
冇信心做稱職媽媽
衛詩雅剛新婚，事業又有成，達到人生高峰，她表示現在絕對是很舒服的狀態，但希望往後日子、人生會迎來更多高峰，而且高峰不一定指事業，可能是人生受到啟發。問到若真的成為金像影后，下一個目標是否做母親？她表示暫時不會生小朋友：「呢樣嘢同我嘅事業無關，但我又唔一定唔會生仔，只係依家唔係恰當嘅時間，因為我會質疑自己係唔係好媽媽，唔好話佗10個月、有幾多錢先合格做父母，小朋友好受原生家庭影響，我唔想未準備好就生佢出來，自己未必有呢個能力照顧得好，我自己都未有咁高分，又點可以孕育一個好人呢？」
認真考慮雪卵
記者指外界都給她很高分，衛詩雅卻說：「唔係咁簡單，全世界最難嘅角色就係父母，做得唔好會對下一代傷害好大！小朋友細個做過一樣嘢，到佢80歲都會有影響，所以唔敢亂去做呢個角色（母親）。可能到我70歲話我準備好啦，但已經生唔出。」問到會否考慮雪卵？她說：「近期有認真考慮，但我都唔知，唔通我雪咗之後，到50歲先生佢出嚟？我覺得對佢好唔公平，因為佢20歲，我已經70歲，驚佢有壓力、有負擔，我哋拍戲都有講呢個問題，但今日唔知聽日事，我都考慮『雪』咗先。（老公有冇意見？）佢冇所謂，抱開放態度，佢尊重我任何決定同願意配合。」並甜笑說：「佢好愛惜我，係真㗎！」
