朱敏瀚操弗身形 王敏奕狂影「肉照」
預告《虛擬情人》有純潔床戲
朱敏瀚（朱仔）與王敏奕於無綫新劇譜「AI情緣」，王敏奕踢爆朱仔於拍攝現場無時無刻做Gym操弗身形，更拍下對方大量「肉照」。朱仔透露當時的身形是「最豐盛」，又笑言與他合作的女藝人都很幸福，因所有性感場面都由他孭飛。
王敏奕、朱敏瀚、黃子恆與胡蓓蔚等昨日到將軍澳電視城宣傳愛情喜劇《虛擬情人》，演AI的朱仔被問是否有難度？他說：「演AI話難唔難，話易亦唔易，因為冇一個所謂正確演繹方法，要演繹到大家相信你係AI先係最大難度。」王敏奕則指自己的角色感情豐富，要經常喊，因不相信男人而創造虛擬情人。
朱仔指自己的角色會有不同版本，更要除衫演出：「拍嗰時嘅身形係『最豐盛』，比之前嘅《拳王》更完美。」王敏奕自爆手持朱仔大量「肉照」：「佢對自己嘅身材管理都好強迫症，已經唔夠瞓，仲要成日喺個廠度舉啞鈴，所以我幫佢記錄低，有需要可以問我攞番。」她笑指朱仔是「性感擔當」，覺得現時觀眾喜歡看男仔性感演出多過女仔，朱仔笑言：「近期同我拍檔嘅女仔都好幸福，因為性感演出我都包辦晒。」問到可有親熱鏡頭？王敏奕預告有純潔床戲：「依家觀眾慣咗尺度好大，但係我哋拍番純情嘅愛情片，可以好唔一樣。」
問到可覺得老公曾國祥完美？王敏奕笑言：「佢有唔完美嘅地方，但唔會公開講。」至於被傳與陳曉華拍拖的朱仔，被問擇偶條件是否靚樣最吸引？他笑言：「呢樣係基本，但內心靚都好重要。（有港姐名銜會唔會加分？）呢啲都係Bonus，可以喺公司做到同事，都一定專業。」
否認與陳曉華同居
對於有傳他以兩萬元月租港島一個單位與陳曉華同居，朱仔表示：「我同媽媽住，我冇住嗰個單位。如果可以出錢租畀同事，希望我有能力幫更多同事啦！（報道話你接載陳曉華去攞車。）我唔想再講車喇！啱啱過嚟之前俾的士撞到車尾，所以我調整緊心情，好彩人冇事。」
