郭柏妍發高燒 可愛「立睡」曝光
陳山聰找數 發起「瞓覺相Challenge」
陳山聰早前出席無綫劇《奪命提示》宣傳活動時，曾揚言手持大量同劇演員的「睡照」！前日他終於找數，在社交網上載自己的瞓覺相，並hashtag「瞓覺相Challenge」，叫「隊友」一齊玩！當中以郭柏妍的「立睡」最特別，原來當日她發高燒拍劇，一有空檔便爭取休息，難怪企棟棟亦可瞓着。
陳山聰前日在社交網率先發起「瞓覺相Challenge」，身為潮人的他睡着時不自覺Chok甫，被張振朗取笑留言：「阿頭，犯晒規喎，瞓覺都可以咁型！」未幾，振朗、劉佩玥、劉穎鏇（Tiffany）、丁子朗（丁丁）及郭柏妍（Rosita）相繼上載瞓覺相，當中最特別是丁丁「半開眼瞓覺相」及Rosita的「企棟棟瞓覺相」！對於丁丁能睜開眼睡覺，山聰搞笑留言：「我有理由懷疑你係反我眼！」振朗則留言：「你唔好有事！」至於Rosita站立式睡覺，則獲拍檔封為「可愛睡模」。
張振朗分享瞓覺必靚秘訣
原來Rosita的企棟棟睡姿背後有段古！她當日發高燒，但不想影響劇組拍攝進度，她未有透露生病。她受訪時表示當時真的很辛苦：「嗰時病得好緊要，同埋發好高燒，但因為Rundown已經排晒，當日我拍嗰場被綁架戲，涉及好多唔同嘅工作單位，如果甩咗呢場，我怕會浪費好多人力物力，所以我頂硬上。劇組好好，喺唔需要我嘅場口畀我休息，瞓一瞓好好多。」
至於振朗與Tiffany的「同框瞓覺甫士」，被監製取笑「識睇梗係睇腳」！因為驟眼看振朗似將腳放在Tiffany的腳上睡覺，但實情是角度問題，Tiffany搞笑叫振朗「Please move your leg」，相當有趣。振朗搞笑分享瞓覺必靚秘訣：「識瞓一定係Gel晒頭、着晒皮褸，或者着禮服瞓覺，咁喺呢個世界就冇人可以影到我樣衰嘅瞓覺相。」
