禪修遠離手機 Gigi療癒心靈
讚金城武狀態弗 期待再合作
梁詠琪（Gigi）前晚出席電影首映禮，自爆前年曾獨自到大嶼山襌修約一星期，遠離手機及資訊下，每日都親親大自然，身心都得到療癒。提到昔日拍檔金城武復出拍廣告，她讚對方保養得宜，若有機會也很想與金城武再合作。
紀錄電影《早鳥》入選第四十九屆香港國際電影節「紀錄片展映」單元，並於前晚舉行世界首映禮，導演蔡瑞琦、監製葉揚、著名作詞家陳少琪及梁詠琪出席。為《早鳥》唱主題曲的Gigi表示感覺似唱情歌：「因為當中講到大自然有一種治癒力量，就好似一個人對住父母或者情人，喺自己低落時來一個擁抱，就已經好療癒。」
她表示2023年曾獨自到大嶼山禪修：「都係一次緣分嘅接觸，希望為自己點解嚟到世界搵答案，亦想更加認識自己而得到快樂。嗰個星期冇手機又遠離資訊娛樂，大自然真係有療癒嘅能力，只係睇住一片雲隨風吹過飄走，天空又再光番，感覺係靈性上嘅成長，喺平日繁榮生活中沉澱，令自己睇嘢更透徹，亦令我對家庭嘅睇法得到成長。」
Gigi透露打算帶女兒入戲院看《早鳥》，欣賞美麗又平靜的大自然：「有時覺得唔使計劃去邊度旅行，去香港又近又靚嘅大自然行吓已足夠。即使有時會有牛屎，但呢啲都係大自然嘅味道。」不過她自問不能像戲中主角之一的余曉彤般強大，潛下水底拯救大自然，因她不懂潛水，最多只是行山。
此外，最近金城武復出拍廣告，勾起網民回憶他與Gigi出道時的「金童玉女」組合，問Gigi會否想再跟金城武合作？她表示自己與很多人一樣期望，但私下沒聯絡對方，不過看新聞知道他保養得很好，亦快有新戲上映。問到有否關心另一拍檔古天樂視網膜穿窿和患嚴重飛蚊症？她說：「我冇留意，咁佢要多啲休息，或者去大自然行吓，吸收天地靈氣。」
