歐聯最強火力 雙巴霸氣十足
狂勇拉芬夏 入波要道歉
歐聯八強首回合昨晨結束，巴塞隆拿及巴黎聖日耳門齊在主場大勝，而且同樣顯示強橫火力！巴塞隆拿4:0大炒德甲多蒙特，半隻腳已踏入四強，原本已在歐聯射手榜領先的巴西前鋒拉芬夏，今仗再交出一個入球兩個助攻，至今累積12個入球及7次助攻，單屆製造19個入球，追平美斯於2011/12球季的球會紀錄（14入球5助攻）。不過拉芬夏表明偷去了隊友古巴斯的入球，入波後已第一時間向他道歉。
巴塞今仗全面控制戰局，25分鐘古巴斯混戰中射門，眼看皮球將越過白界，拉芬夏門前瞓身加一腳入網。利雲度夫斯基於48及66分鐘梅開二度，加上耶馬爾在77分鐘建功，取得壓倒性優勢。拉芬夏賽後說：「我第一時間向古巴斯道歉，因為呢個原本係佢第一個歐聯入球，但當時我唔肯定個波會唔會出界，出腳係本能反應。好在佢叫我唔使內疚，因為對佢嚟講都計咗一次助攻！」
巴塞教頭費歷克賽後說：「今日我哋做得好好，不過仍然犯咗一啲錯誤，我哋仲有進步空間。次回合作客德國唔可以鬆懈，要保持今仗跑動同速率，避免對手有機可乘！」天才翼鋒耶馬爾於入球後要求被換離場，費歷克叫大家安心：「佢冇受傷，只係過度疲勞，今季佢為球會同國家隊踢得太多。」
維拉艾美利拒絕投降
至於巴黎聖日耳門，則在主場3:1擊退英超阿士東維拉。雖然踢到補時才由紐奴文迪斯拉開紀錄，不過全場壓住維拉狂攻，合共29次射門盡顯優勢。不過維拉領隊艾美利賽後拒絕投降：「輸1:2同1:3分別唔太大，我哋次回合點都要贏波，依家只係要贏多粒！PSG當然好勁，但今場我哋一直咬得好緊，競爭力十足。返主場嘅比賽係巨大挑戰，但我哋喺維拉公園球迷助威下，會更加強大！」
根據足智彩最新冠軍賠率，巴塞隆拿落飛成為2.75倍大熱；巴黎聖日耳門同阿仙奴一樣，3.25倍次熱，兩隊甚有可能在準決賽相遇；之後為7倍的國際米蘭。首仗吞阿仙奴3蛋的皇家馬德里升至24倍，多蒙特則成為1,000倍最大冷門。
