回顧同行33年 伊健忍淚謝粉絲
相隔8年搞歌迷聚會
「不老男神」鄭伊健日前相隔8年舉辦歌迷聚會，與來自世界各地的歌迷共度愉快一晚。席間播出他與粉絲一起成長的片段，伊健看後感動到講不出聲，忍着淚衷心感謝大家支持。
「鄭伊健真心同盟國際歌迷會」成立33周年，日前以「久別重逢」為主題舉行聚會，筵開25席，招待約300位來自香港、內地、台灣、日本、韓國和新加坡等各地粉絲。相隔8年再辦歌迷聚會，伊健化身導演及司儀，親自安排表演項目。除了邀請合作無間的音樂監製陳光榮、歌手朱雋言和圈外好友Percy組成期間限定Band表演外，還有陳光榮兒子Aiden演奏大提琴。席間播出粉絲多年來跟伊健經歷的片段，伊健看後非常感動，一度講不出聲，他強忍淚水說：「卅幾年，有啲朋友喺度，有啲移咗民，有啲朋友……大家身體健康！」
唔敢着校服表演
伊健問台下粉絲：「其實Fan Club成立咗幾耐？卅幾年咩？多謝大家，原來我哋已經係卅幾年偶像同粉絲嘅關係。」之後他邀請陳光榮出場，並說：「大家記唔記得上次Fan Club Party係幾時？當時（2017年）我哋着咩衫表演？幾年前我哋仲可以着校服，依家就……」
伊健一連唱出《隨時候命》、《一起衝一起闖》和《自動勝利Let's Fight》等歌曲，氣氛高漲。當他演唱《Stronger》前表示：「疫情期間好蕭條，要戴口罩出街，有好多嘢唔做得。嗰時我拍咗個廣告，首歌由陳光榮寫，我好鍾意歌詞，鼓勵大家喺低潮時唔好咁易放棄。」之後他與粉絲合照和抽獎，送出簽名藍牙喇叭和海報。活動尾聲，粉絲意猶未盡嗌Encore，全場大合唱《Together》。
最後伊健宣布好消息：「以前香港唔太重視電影音樂，直至陳光榮出現，《仍能情深愛上》來自《姊妹情深》，仲有《風雲》、《中華英雄》、《極速傳說》，唔止我嘅電影，仲有《無間道》同《頭文字D》都係來自陳光榮。依家好多電子嘢，撳個掣就聽到，好少人會做隻碟留個回憶，佢就係做緊呢件事，今次仲會出黑膠碟，留住今年曾經有一樣嘢出現，感動到大家，記低佢，呢個就係我哋嘅回憶。」
