搣甩公主形象 姚焯菲晒女人味
「除衫」寓意破繭而出
「聲夢小花」姚焯菲（Chantel）推出全新單曲《New Fantasy》，一改以往「小公主」的形象，挑戰型格舞曲，搖身一變展現出成熟女人味。她於MV中逐一脫下身上7件印有過往單曲封面的外套，迎合新歌「蛻變」的主題。
18歲大個女的Chantel推出今年首支派台歌《New Fantasy》，以「蛻變」作主題，希望向大家展示全新形象。她於MV連場勁歌熱舞，事前不斷上堂練舞，她說：「為咗今次MV練咗十幾個鐘，同埋我覺得最難係記好每個動作，記得之後仲要花好多時間琢磨點樣做得最靚、最流暢。」
為呼應「蛻變」主題，MV服飾原來有小彩蛋，就是Chantel穿上7件分別印有以往個人單曲封面的外套，包括《初心小島》、《這個姿態》、《Dreamscape》等，然後逐一脫下，寓意拋開以前的自己破繭而出。
盼粉絲日日聽《New Fantasy》
Chantel表示與團隊為新歌及MV落足心機：「呢首歌係全新風格，我心情係好緊張，因為我唔知大家會對呢首歌有咩意見，同時亦都有一份期待，到底粉絲會點諗？會唔會成日聽呢？」她很喜歡新歌帶出自信、堅定的感覺：「歌詞第一句『高踭我踏前一寸』，已經可以令大家幻想到個畫面。我唔理側邊嘅目光，着住高踭鞋我要望前，要好堅定咁向前行。」並指歌詞很有意思：「『新姿態襲來，巡視十個圈』，我認為呢一句個感覺好強，係成年人或者係好清楚自己目標嘅人先會咁做。」
Chantel希望大家認識她的新形象，故旋律與歌詞都很重要，才可令到歌曲圓滿：「大家可以聽埋我之前嘅作品，去留意有咩分別。希望大家聽完呢首歌都會有一個Fantasy，會不停喺個腦Play緊，好想繼續聽，會有一個每日都Play呢首歌嘅衝動啦！」
