蕭正楠幫囝囝打工 薪酬撥入教育基金
蕭正楠榮升爸爸後首個代言廣告日前進行拍攝，他表示現時更加着重健康，會選擇使用安全和有效的產品：「當初我以為BB好輕，但最近翠如話我背脊厚咗，可能呢幾個星期餵奶、抱BB，有時候同一個姿勢維持太耐，不知不覺身體唔同部位都會痠痛。」問到拍劇和照顧小朋友哪樣比較累？他笑言：「兩樣用嘅體力唔同，對住小朋友更加要打醒百分之二百嘅精神。就算小朋友一個細微動作，例如大聲喊、嘔奶就會好緊張，有時仲會自責做得唔夠好，心情起伏好大。」
蕭正楠笑言現在一切以家庭為先：「我幫囝囝打工㗎！今次代言廣告酬勞，全部撥入囝囝嘅教育基金，希望佢有最好嘅事物，我同太太最大期望係囝囝開心。」除了是廿四孝爸爸，蕭正楠亦是體貼老公，每當太太黃翠如身體有痛症時，他會幫太太捽藥油，非常恩愛。
