阿仙奴大捷 皇馬機會只剩4%
賴斯罰球世界波起孖
歐聯八強首回合，英超阿仙奴昨晨踢出令人意外佳作！憑迪格蘭賴斯兩個令人難以置信的罰球世界波，「兵工廠」主場3:0擊退皇家馬德里，與主場球迷分享了一場史詩式歐聯勝仗！這是迪格蘭賴斯足球生涯首次直射罰球入網，而且一入便起孖，令他同時成為首位英格蘭球員，在一場歐聯淘汰賽中射入兩個直接自由球。
上半場雙方互有攻守，主隊點數上稍佔先。下半場58及70分鐘，迪格蘭賴斯連續射出兩個精彩絕倫罰球世界波，第一個以超級弧線彎過人牆，第二個角度與勁度都無懈可擊，令全場表現出色的皇馬門將高圖爾斯徹底投降！加上米基爾馬連奴75分鐘妙射錦上添花，幫助阿仙奴淨勝3球。
阿仙奴領隊阿迪達賽後說：「當你已經接近20年未對過皇馬，亦未喺呢項賽事取得咁嘅戰果，你必須準備好書寫自己嘅歷史！」阿迪達將大勝歸功於開賽前15分鐘，主場球迷為球隊營造出最強氣勢，而迪格蘭賴斯的精彩罰球令結果完美。賴斯則笑着說：「我哋正在戰鬥，我知道必須入波！第一球原本只想傳球，但當睇準咗人牆嘅位置，改變主意嘗試彎過佢！入咗之後，射第二球時已經好有信心！我明白仲有第二回合，比賽未完，但呢一刻真係欣喜若狂。相信幾年之後，我會意識到今日所做嘅一切有幾咁特別！」
英超鎖定下屆5個名額
踢完首回合，根據專業統計網站《Opta》數據分析，阿仙奴晉身四強機會已高達96%，皇馬後上出線機會只剩低4%。皇馬主帥安察洛堤說：「頭60分鐘比賽仲係均勢，但失波之後球隊精神層面出現咗問題。」當被問到皇馬從未試過首回合落後3球下反勝時，安帥說：「總會有第一次！你必須盡力嘗試，我哋一定會努力！」中場比寧咸則說：「賴斯今場嘅罰球好瘋狂！但次回合返主場，我哋仲有90分鐘去做瘋狂事情！」經過今場賽果，英超已經鎖定歐洲系數前兩名資格，確保下屆會有一個額外歐聯席位，共有5隊可以參賽。
