李城羞家 雲佬暗示辭職
破英超最長「零入球」輸波紀錄
李斯特城繼續沉淪！這支排尾二球隊，昨晨英超主場淨吞紐卡素3蛋，連續8場聯賽輸波兼零入球，英格蘭頂級聯賽48年來最差，亦為1992年轉制英超以來最羞家紀錄！季中接掌教鞭的荷蘭領隊雲尼斯達萊，賽後亦暗示準備辭職，傳聞戴治及羅素馬田，最有機會成為「狐狸兵團」下一任主帥。
李城今仗開賽不足兩分鐘便被積及梅菲攻破大門，然後踢到11分鐘，紐卡素法比安舒哈福至心靈，趁李城門將希亞文臣企得太出，未過半場已大腳笠射，皮球中楣彈出，梅菲趕到補中，梅開二度射成2:0。34分鐘倒戈的哈維班尼斯門前執雞錦上添花，半場已經領先3:0。易邊後紐卡素放緩進攻節奏，相反李城經過連番換人後搶回不少攻勢，但限於質素及把握力差無法破蛋。
賽後「雲佬」已預示有離開準備：「情況相當困難，攞唔到成績好失望。我哋嘅目標係進步，李斯特城先至係最重要，我哋要為球會利益作出最好決定！」李城輸波後仍落後尾四狼隊15分，餘下僅7輪聯賽，護級機會已名存實亡。
15歲小將登場 放眼未來
不過，「狐狸兵團」今仗仍然有令球迷歡呼時刻！當比賽進行至74分鐘時，小將蒙加首度後備登場！並以15歲零271日之齡，成為英超史上第2年輕上陣球員，僅次於阿仙奴翼鋒尼華尼利於2022年9月創下紀錄（15歲零181日）。司職中場或翼鋒的蒙加，落場後每次掂波都獲得李城球迷熱烈掌聲，今場這位小將更穿着特別版球衣上陣，因為李城的心口贊助商為博彩公司，蒙加未夠合法年齡參加博彩，所以球衣未有贊助商標誌。「雲佬」賽後亦盛讚蒙加：「你可以睇到佢有頂級才華，一個擁有高速嘅翼鋒，佢嘅天賦值得有出場時間。佢係李斯特城嘅未來，希望日後佢會有更多機會落場！」
