要求濕吻楊偲泳 珈其得把口縮沙
《搗破法蘭克》被刪咀戲曝光
岑珈其與楊偲泳（Renci）於新片《搗破法蘭克》再演情侶，昨日電影公司發放兩人被刪走的咀戲劇照。Renci踢爆珈其原先要求「脷疊脷」濕吻演出，但正式拍攝時，男方竟然臨陣縮沙，被取笑得把口！
由談善言、林家熙、岑珈其、楊偲泳、袁富華、楊偉倫等演出的動作犯罪電影《搗破法蘭克》，獲選入圍「第22屆西班牙亞洲夏日電影展」 競賽部分，日前再入選「第24屆紐約亞洲電影節」。電影將於復活節4月17日正式上映。
岑珈其自認失敗
《搗》片打破傳統犯罪電影風格，無論導演或演員皆以嶄新方向挑戰固有框架，將帶給觀眾新思維及新畫面。Renci與珈其飾演曖昧賊拍檔，兩人出生入死之餘，拍攝時不乏拖手逃亡及咀戲。導演安排開鏡首日拍Renci主動向珈其獻吻，戲裏戲外皆怕醜的珈其勁尷尬！他表示拍攝前跟Renci商量如何配合演繹：「其實我覺得自己有啲失敗，明明男仔要令女仔安心，反而要女仔同我講OK冇問題，佢好專業。」
他認為配合劇情，輕輕一吻已足夠能表達箇中意義：「我同Renci之前兩套戲合作都係演情侶，但冇試過錫，反而今次唔係情侶，曖昧關係就有錫，感覺好浪漫。」Renci笑言：「我哋圍讀時，尺度係大嘅，但基於好多原因就縮到好細。導演本身諗住激啲，我之前係都擔心人身安全，依家都唔敢面對，因為珈其太太係跆拳道黑帶，哈哈！」她更踢爆珈其原先建議「脷疊脷」演出，但對方臨陣縮沙：「圍讀時佢話係脷疊脷，佢話會浪漫啲，但係去到現場我同佢講『咁我伸脷喇』，佢就縮沙，仲要我做主動！」楊偉倫聞言說：「咁就真係衰，珈其得把口，又有要求，但係又要人哋做主動，呢啲唔要得！」不過由於電影內容豐富，導演為維持緊湊節奏，忍痛剪走該場咀戲。
幸好另一場拖手戲亦展現浪漫氛圍，珈其說：「我哋好浪漫，我覺得好似動漫嘅浪漫鏡頭，共患難共生死。」珈其更唱鄭伊健名曲《甘心替代你》，Renci笑言：「我唔敢拖咁耐，驚抽離唔到。」
