小巧下一站紅館 吊威吔耍雜技
輕鬆打側手翻 唔敢同Twins比較
鄧小巧加盟英皇娛樂後的首個個人音樂會《I'm here Live 2025》前日於麥花臣場館舉行頭場演出，除了外籍老公白先生外，還有英皇老闆楊受成、歌手李幸倪、海兒、泳兒等捧場。小巧坦言人望高處，希望下一站在紅館開騷，笑言屆時除了唱歌外，更會表演耍雜技，因現在做歌手要周身刀張張利！
鄧小巧一口氣連唱9首歌，現場掌聲不斷，她用紙巾拭淚後說：「你哋唔好整喊我，你哋都知我幾眼淺。冇諗到聽到你哋嘅掌聲會咁激動。無論你之前有冇睇過我嘅表演，都好多謝你哋嚟我嘅音樂會。」此時有男觀眾大叫：「你好靚呀！」她開心說：「我覺得呢句要翻譯畀我老公聽，其實佢全晚都聽唔明，幾慘㗎！」
之後小巧唱《兩溝》時打側手翻，引來全場「嘩」聲四起，她笑言：「我相信英皇娛樂擁有香港識得打側手翻最多女歌手嘅公司，根據非正式統計，老闆楊博士係咪好鍾意簽識打側手翻嘅人？可能以後加入呢間公司要識打側手翻。講笑咋，希望大家睇得開心啦！」Encore環節，觀眾大叫希望她唱《半杯水》，小巧說：「老老實實，我會找數，如果我上紅館！即係咁，今晚啲歌都好難唱，唱番首舒服啲得唔得？」最後她唱《將沙拋給一片海》和《雲吞》為音樂會作結。
多謝老公幫忙 成功減磅
小巧完騷後受訪，提到她輕易打側手翻，她表示小時候愛跳繩，拍《四大發明》MV時亦有跳現代舞，雖然自認筋骨柔軟，但不敢跟Twins作比較。她特別感謝老公經常陪行山，以及逼她每日行一萬步及食維他命補充劑，成功減了幾Kg，令身體更健康。
提到她的舞姿很性感，老公可有見過她性感一面？小巧笑言：「結婚咁耐乜都見過晒啦！不過我喺屋企練舞會覺得尷尬，老公望住就唔想跳，會匿喺房練習。（下一站紅館開騷？）希望啦！人望高處，到時會表演吊威吔、擘腿同拱橋，跳火圈就講笑喇！可以耍雜技，依家歌手淨係唱歌唔夠㗎！」
