法拉盼拍劇待遇 睇齊荷里活巨星
減肥演「瘋婦」呻慘
陳法拉演出由張家輝自編自導自演的新片《贖夢》已經上畫，她與家輝飾演恩愛夫妻，但因投資失利導致二人關係產生巨變。法拉笑言第一次為角色減肥，大呻冇得吃美食，比戲中角色更慘！現居美國的她坦言小朋友年紀太小，暫時不會拍劇，故她希望將來可以像荷里活巨星一樣，獲劇組安排小朋友同行。
採、攝：記者 達里
陳法拉讚張家輝能演又能導，讓演員很清楚他想要什麼效果：「例如佢講咗我哋戲中兩公婆嘅關係，之後就畀我自由發揮，因為我信任呢位導演，基本上唔使試戲或者用第二種演法。」法拉指家輝是演員出身，很明白演員面對的問題：「佢帶畀我同其他合作過嘅導演有唔同感覺，化學作用更大。」對於放下美貌演瘋婦，她笑言：「其實我都係做番自己，我都唔知點解一直畀人印象係斯文、鄰家女孩嘅感覺，我都希望演嘅角色可以尺度大啲，有甜蜜、有瘋狂，每個角色都有深度同層次。」
想執導西部片
法拉坦言以前害怕演歇斯底里的角色，故今次在戲中盡量讓情緒投入，希望能「自然」演出。她又稱首次為角色減磅：「導演要求我減五六磅，但拍嗰陣係聖誕前後，我只能望住家人食聖誕大餐，而且我同家輝係先拍兩公婆幸福嘅戲，到臨近聖誕拍辛苦部分，我覺得自己比電影角色更加慘！」
曾執導演筒拍短片的法拉坦言仍有導演夢，希望挑戰拍西部片：「如果能夠開拍西部片，我就未必會演喇，因為要專心做導演同研究劇本。我唔似家輝咁厲害。」問到會否再拍劇？她坦言小朋友年紀尚小，不想離開他們太久，要長時間拍劇有一定難度：「等小朋友再大啲啦！希望將來可以好似外國明星咁，例如妮歌潔曼之前嚟香港拍劇，劇組安排佢帶小朋友同行。」法拉讚這種安排可以讓演員少了顧慮，更能專心演出。
