愚人節收玫瑰 江嘉敏疑被整蠱
曾遭狂迷起底寓所地址
江嘉敏昨日到觀塘出席商場活動，吸引大批市民圍觀。她自爆凌晨12時收到99支玫瑰花，但因昨日是愚人節，不知道被誰整蠱。她又稱稍後會參演音樂劇，現正積極練歌和跳舞。
江嘉敏自從2月離開無綫後，工作接個不停。昨日她到觀塘出席商場活動時透露，愚人節凌晨12時收到99支玫瑰花，但不知道是誰送花。問到有否懷疑對象？她笑言：「好多喎！我都喺網上搜尋過愚人節送花嘅含意，係咪代表整蠱人。（送99支玫瑰整蠱你，好大手筆喎！）唔係喺情人節買，應該會平啲嘅。」提到送花的人知她寓所地址，她表示很多朋友都知道，最恐怖反而是曾在社交網收到私訊，詳細列出她住哪棟大廈及幾座幾樓。
否認富貴醫生送花
她得戚稱經常收花︰「有男有女，生日收花好正常！（係咪富貴醫生送？）唔係，之前有問佢，我仲話『不如認咗佢，請我食飯好過』，但佢話唔係佢，唔係就唔係，咁到底係邊個呢？好出嚟認咗佢，畀我講聲多謝都好！」問到富貴醫生有否呷醋？江嘉敏反問：「點解會呷醋？唔好亂寫亂講，係先好講。依家未係，交流吓先，我依家努力工作先。（爭啲乜？）隨緣，冇得夾硬嚟。（如果係佢送呢？）多謝囉！」並強調自己現時單身。
江嘉敏透露有份演出的音樂劇《我的青春日誌》快將公演，首次做舞台劇的她努力健身和練歌，已瘦了兩三公斤。她表示飾演校長，將客串4場︰「我完全係一張白紙咁入去，我要比其他人更努力，需要唱歌跳舞十幾分鐘。（你唱得？）我實話唱得。」問到有否壓力？她坦言有，因自己沒經驗，導演陳恩碩也叫她不要給自己太大壓力。
