陳茵媺撐陳豪靚仔 唔覺似父女
凍齡有術 反令丈夫顯老
視帝陳豪早前在社交網拍片，老婆陳茵媺亦有出鏡，陳茵媺保養得宜，絕不似43歲，但有網民竟留言指兩公婆似「父女戀」，引來其他網民讚好。陳茵媺前晚出席活動時力撐老公依然靚仔，只是近期忙拍劇才顯得有點憔悴。
慧妍雅集前晚舉行43周年慈善晚會，歷屆近百港姐盛裝出席。陳茵媺對於被網民指成功凍齡，反而令年長她10歲的老公陳豪顯老，被取笑是「父女戀」，她驚訝說：「係咩？佢仲好靚仔呀！我冇覺得佢老咗，每個人一定會經歷時間，佢有做Facial，不過佢近排拍劇太忙，但我覺得佢依然好型、好靚仔喎，佢喺我眼中係完美。（陳豪介意被指父女戀？）我覺得冇呢樣嘢。（陳豪要進補？）佢唔需要，相信佢拍完劇會精神啲。咁佢真係好忙，呢輪去不同地方拍嘢冇停過。」
黃嘉雯擔心走光
穿低胸晚裝的的黃嘉雯表示性感程度不及台慶當晚：「今次着公主Feel嘅裙，不過條裙好重，我要不停咁拉住，驚會跌落嚟。條腰嘅設計係好貼身，但唔係好安全，所以唔好踩我條裙尾，啲人要遠離我。（有冇做安全措施？）係黐唔實嘅，我準備不足，衫身有少少鬆，裏面有戴NuBra，一陣要行上台，我係有少少擔心。」
梁凱晴笑言特別挑選着白色吊帶裙：「襯番Backdrop ，想仙氣啲，慧妍雅集畀人感覺好優雅，同埋想減吓肥，呢幾日食少咗嘢，食餸唔食飯。平時我係『飯桶』，希望瘦到啦。」宋宛穎則透露晚裝的腰部設計有透視效果，為了着靚裙，已節食數日：「為咗呢套衫冇食飯幾日，因為太貼身同埋露得多少少。」
翁嘉穗與老公鄔友正一齊現身，提到早前鄔友正在社交平台爆老婆「貪錢」惹禍，他說：「有好大約束力，其實我冇所謂，但佢好有所謂，我唔係犯法唔係害人，不過佢嘈得好犀利，以後盡量唔講牽涉佢嘅事。」翁嘉穗則稱：「係朋友通知我先知，我只係向老公表達不滿。」
