宣萱久未做主持搵愛犬練習
宣萱昨日出席銀行活動及訪問《黑白大廚》名廚Edward Lee，全程中英語「廣播」，表現流暢得體。不過她受訪時大呼緊張：「上次做主持係上世紀嘅事，有啲生疏，之前喺屋企不停對住隻狗練習演講。」問她與古天樂合演的《尋秦記》電影版何時上映？宣萱表示仍未落實，因要等好檔期，不過她透露主演劇集《執法者們》會比《巨塔之后》更早播放。
對於《巨塔之后》原定近期播出，但卻臨時抽起，宣萱稱不知原因，但覺得冇所謂：「我對呢啲好隨緣，下半年播都好，因為之前我有一啲工作同安排咗去滑雪，擔心撞期唔可以宣傳。」提到劇集下半年播映，角逐視后機會更大；她笑言：「冇諗過，不過如果再攞視后都唔介意，況且有關醫療或案件題材嘅劇集，一向迎合觀眾口味。」
