雲尼斯奧斯 抗拒踢英超
現年24歲的巴西鋒將雲尼斯奧斯，上輪面對哥倫比亞大發神威，除開賽不久搏得12碼外，更於補時最後一刻絕殺對手，是巴西全取3分的頭號功臣。不過這位應屆金球獎亞軍，過去半年來一直被轉會傳聞困擾，除沙特聯明言願以破紀錄轉會費及薪酬撬人外，過去一周亦瘋傳英超富豪車路士認真斟介，傳聞轉會費達2億歐元。
不過，雲尼斯奧斯早已明言不會在現階段轉戰中東，在明早對阿根廷之前，亦重申與皇馬續約的渴求：「我好平靜，因為我嘅合約到2027年，我希望盡快同皇馬續約，因為我喺呢度好開心。」雲尼斯奧斯至今已為皇馬上陣逾300場，取得超過100個入球，被問到未來會否考慮到英超接受新挑戰時，「皇馬太子」毫不考慮地說：「我只想同世界最好嘅球員、教練、主席同球迷一齊，喺呢度每個人都愛我，我搵唔到比皇馬更好嘅地方！」
