劉沛蘅盼演虐戀電影 ANSONBEAN主攻動作片
香港文匯報訊（記者 阿祖）第29屆香港國際影視展（FILMART）本月17日開幕，寰亞電影於18日晚在中環舉行酒會，寰亞傳媒集團老闆林建岳博士、寰亞電視節目製作（香港）有限公司董事總經理梁家樹、香港電影工作者總會會長古天樂、金像獎最佳剪輯獎黃海、新晉導演獎李光耀、卓亦謙、簡君晉，藝人許恩怡（Natalie）、ANSONBEAN 、劉沛蘅（Hillary）、蔡穎恩、連家穎、陳嘉寶、何嘉莉、林熙彤、曾睿彤、麥少瑜、岑麗香和梁靖琪等悉數到場，星光熠熠。
Hillary坦言在派對上認識了不少電影導演和編劇，獲益良多。她說：「現場太熱鬧、太多人，雖然唔能夠逐位傾到好深入，但好開心有機會介紹自己畀大家認識，始終作品唔多，而且係新演員。」她自言是愛情片忠粉，希望也可以飾演愛情故事主角，她說：「我係一個情感好豐富嘅人，但只對住好親近嘅朋友才會表露出嚟，所以好想挑戰自己，透過電影去表達。愛情故事有好多種，我希望拍虐心嘅電影，令觀眾睇完會有領悟。」她有份主持的電視遊戲節目系列《膠戰》，將於下月搬上舞台開騷，Hillary透露有驚喜：「今次希望同觀眾多啲互動和令大家睇得開心，我哋度咗好多特別嘅表演，總之除咗唱歌跳舞之外，仲會加入一啲好少喺舞台上見到嘅元素。」
至於努力追「動作演員夢」的ANSONBEAN，透露最近對自己有新發現：「我每完成一個拍攝項目就發現自己多一個新面向，感覺非常新奇和不可預測，多謝每次都有機會發掘更多可能性。例如最近播嘅劇集，因為有啲搞笑，而且係我唔擅長嘅，所以一路拍我一路擔心，結果出到嚟反應好、大家好鍾意。原來搞笑，氹到觀眾開心，自己睇返都覺得好笑，突然間unlock（解鎖）喜劇路線。」他希望以「動作片」為主軸，拍攝愛情、搞笑或懸疑等電影。除了練習武術，ANSONBEAN亦努力學演戲，尤其是學習「自然」，身旁曾跟他合作拍劇的Hillary笑說：「其實你平時都好唔自然！」ANSONBEAN承認：「無論我對鏡頭拍戲，或者平時同朋友交談，都會因為個腦諗緊太多嘢，講話變得唔自然，我會努力改善。」
