解鎖搞笑本能 陳毅燊冀演喜劇
做戲唔自然 努力改善
陳毅燊（ANSONBEAN） 唱而優則演，一直立心做動作演員的他最近拍喜劇，解鎖了自己的搞笑本能，更獲外界一致好評。他坦言見到觀眾開心很有滿足感，同時為自己打下強心針，很想拍一齣包含動作、愛情及懸疑成分的喜劇。
「第29屆香港國際影視展」（FILMART）本月17日開幕，日前寰亞電影在中環BEEFBAR HONG KONG舉行酒會，寰亞傳媒集團老闆林建岳、寰亞電視節目製作（香港）有限公司董事總經理梁家樹、香港電影工作者總會會長古天樂、ANSONBEAN、劉沛蘅（Hillary）、蔡穎恩、連家穎、陳嘉寶、何嘉莉、林熙彤、岑麗香和梁靖琪等出席，場面星光熠熠。
劉沛蘅想做愛情片主角
Hillary透露在派對上認識了不少電影導演和編劇，獲益良多：「現場太熱鬧、太多人，雖然唔能夠逐位傾到好深入，但好開心有機會介紹自己畀大家認識。始終我作品唔多，而且係新演員。」她自言是愛情片忠粉，希望可以當愛情片主角：「我係一個情感好豐富嘅人，但只對住好親近嘅朋友先會表露出嚟，所以好想挑戰自己。愛情故事有好多種，我希望拍虐心嘅電影，令觀眾睇完會有領悟。」
至於一直追「動作演員夢」的ANSONBEAN透露有新目標：「我每完成一個拍攝Project就發現自己多一個新方向，感覺非常新奇同不可預測，好開心每次都有機會發掘更多可能性。例如最近播嘅劇集，因為有啲搞笑，係我唔擅長嘅，所以一路拍一路擔心，結果出到嚟反應好好。原來我都可以搞笑，氹到觀眾開心，自己睇番都覺得好笑，突然間解鎖喜劇路線。」他希望以「動作片」為主軸，拍攝愛情、搞笑或懸疑等電影。
除了練習武術，ANSONBEAN亦努力學演戲，尤其學習「自然」，曾跟他合作拍劇的Hillary笑言：「其實你平時都好唔自然！」ANSONBEAN承認說：「無論我對鏡頭拍戲，或者平時同朋友講嘢，都會因為個腦諗太多嘢，講說話變得唔自然，我會努力改善。」
