安帥發火：「少於72小時」拒絕再戰
麥巴比挺身救主 皇馬疲兵險勝
西甲第28輪，衛冕皇家馬德里昨晨作客對維拉利爾，經過一場極艱苦奮戰下後來居上，2:1擊敗黃色潛艦全取3分，保持與巴塞隆拿及馬德里體育會3雄鼎立爭霸形勢。不過賽後皇馬主帥安察洛堤大發雷霆，認為西甲聯賽會收買人命！皇家馬德里會方亦透過自己的皇馬電視台宣布：「如果未來未能保證兩場比賽之間擁有72小時距離，皇馬將拒絕比賽！」
皇馬於香港時間上周四4:00am，才在歐聯16強次回合，作客與馬德里體育會踢足120分鐘，最後憑互射12碼獲勝殺入八強。然後昨晨（香港時間周日1:30am）再於西甲作客對維拉利爾，距離歐聯比賽結束只有66小時，而且還需要連續作客，皇馬不但未能進行訓練，連休息時間亦欠奉。皇馬今仗大部分時間處於下風，並於開賽7分鐘便先失守，幸而王牌前鋒麥巴比在重要時刻做雷霆救兵，於17及23分鐘梅開二度，協助皇馬反敗為勝，不過皇馬戰將明顯未能回氣，大部分時間捱打，苦戰至完場時已經筋疲力竭！
皇馬電視台 尋求FIFA保護
安察洛堤賽後非常憤怒：「賽會為電視轉播同金錢，拒絕我哋嘅延遲開賽要求！我可以喺呢度講，今日係最後一次喺休息不足72小時情況下比賽！我哋唔會再接受咁做，雖然曾經兩次向賽會反映，但佢哋無動於衷！」皇馬電視台賽後聲明：「皇馬將拒絕接受少於72小時休息下再踢任何比賽，如果再有類似事件，會方會向國際足協（FIFA）請求保護。之前國際足協曾經發布針對健康建議，講明兩場比賽之間需要最少三日時間休息。」
皇馬門將泰拔高圖爾斯賽後說：「開波7分鐘就失波，其實情有可原。休息唔夠，大家連腳都好難抬得起！西甲賽會咁樣安排賽程，除咗令球員容易受傷之外，對球隊同球員都缺乏尊重！」中場盧卡斯華斯基斯亦話：「我哋嘅投訴唔係為自己，而係為咗所有球隊同球員健康！今場波好好彩，冇人受傷，但比賽結束後，我哋最少有5個球員癱坐喺球場上，因為已經完全虛脫！」
