遭鄧麗欣「調情」 MC一秒耳紅
圓夢與兒時偶像合唱
鄧麗欣（Stephy）一連三場紅館演唱會前晚舉行第二場，邀得曾合作電影《我談的那場戀愛》的張天賦（MC）擔任表演嘉賓，二人合唱《好心好報》，完美還原電影中Stephy為MC打領呔的調情戲，MC害羞得一秒耳紅，非常搞笑。
鄧麗欣前晚舉行紅館演唱會第二場，Cookies五名隊友吳雨霏（Kary）、楊愛謹（Miki）、區文詩（Angela）、何綺玲（Elaine）與陳素瑩（Gloria）結伴捧場。擔任嘉賓的MC以白馬王子Look出場，與穿白色連身長裙的Stephy非常合襯，MC說：「其實我好緊張，因為好少同你咁近距離。上次係拍戲打呔嗰陣，依家都有啲餘韻，好緊張！」Stephy說：「其實拍戲先至真正認識你，之前只係聽過你啲歌，知你唱歌好好聽。」MC則說：「我好早認識你！」Stephy無奈一笑，MC續說：「我每次演出最緊張係記歌詞，有時要靠提詞機，但今次合唱呢首歌我唔擔心，因為歌詞我好熟，我好自信可以望住你唱。」Stephy說：「唉！你講啦，細細個去唱K成日唱吖嘛，我畀你講，冇所謂！」MC不客氣表示能與Stephy合唱是成就解鎖，完成兒時夢想，全場大笑。
Stephy禮尚往來，送上領呔答謝MC做嘉賓，更二話不說即場為他戴上，兩人幾乎面貼面，正當Stephy讚他沒有面紅時，但MC卻耳紅，全場爆笑！Stephy退場後，MC不停用手撥風為耳朵降溫，他尷尬說：「真係唔呃人，我一尷尬就耳仔紅。」然後演唱新歌《說謊者》。
畫作融入演唱會
演唱會尾聲，Stephy唱《Fantasy Tale》，觀眾都站起來跳舞，氣氛熱鬧。她透露演唱會期間，大銀幕展示的畫是她特別為今次演唱會而畫：「雖然準備演唱會好忙，但我堅持畫畫，因為除咗唱歌跳舞表演之外，亦希望視覺上都加入自己嘅心思。可能只有我自己明白，例如創作期間嘅思考，都可以注入一啲神秘嘅力量，融入演唱會。」完場後歌迷不肯離開，Stephy再出場唱《最後一塊》後，與樂手一齊跟觀眾謝幕。
