基爾拒認命 作客大「登」科
歐洲5大聯賽 唯一睇齊紅軍
德甲近期戰果極度反常，已連續兩輪共18場比賽，主場球隊都無法取勝。上輪4支參加歐洲賽勁旅：拜仁慕尼黑、利華古遜、多蒙特及法蘭克福，更全部在主場爆冷輸波，熱門客焦頭爛額！不過黑柴成績依然保持穩定正數，今輪主題是周日晚護級生死戰，包尾海登咸主場對尾二基爾，﹝2.5/3﹞大盤是信心之選（NOW 639台周一12:30am直播）。
基爾今季隊史首次升上德甲，班費及全隊身價亦是德甲最低。不過這支完全缺乏經驗的廉價球隊，卻憑進攻足球贏得各界關注及尊重！要知道基爾開季至今仍保持一個難得紀錄：每場作客聯賽都有入波！球季已完成超過三分之二，環顧英、西、德、意、法5大主流聯賽，只有兩支球隊能夠保持這項紀錄，除基爾外，就只有英超一哥利物浦！火力強橫如巴塞、PSG及拜仁亦無法做到。要知到基爾全隊的身價僅為4,000萬歐元，只是紅軍的25分之一，紅軍有多名後備球員，個人的身價也超過基爾全隊，基爾有此成績絕不簡單！
基爾今季德甲作客12戰入19球失30球，作客入球德甲第7多，失球更是第2多。至今12戰中有9場總入球達到4個以上，另外兩場總入球亦有3個，只有一場例外。最可愛之處是拒絕認命，不論場上形勢及賽果如何，球證未吹完場雞亦不放棄進攻，記得第6輪落後兩球下逼和衛冕利華古遜、第20輪作客對拜仁，落後0:4追到3:4完場，不屈鬥志令人佩服。
基爾進攻中場7號仔史基比斯基，最近6次起腳射門入了6球，命中率100%，連拜仁哈利卡尼亦難相比！上季効力丁組聯賽22歲前鋒菲爾哈利斯，與日本好波之人町野修斗同以7球並列隊內首席射手，前線默契亦不斷進步。主隊海登咸因分心歐協聯，聯賽成績淪落包尾，不過歐戰出局後近期已見起色，剛於歇冬期加盟的上半季德乙最佳射手薛夫斯華迪斯，剛戰賀芬咸入靚波開齋。今戰雙方形勢上和都唔掂，肯定合演對攻好戲。
雙堡鋼門 「細」保不失
此外，弗賴堡門將艾杜保路、奧格斯堡門將達文，最近都先後打破球會隊史最長時間不失球紀錄，而且紀錄仍在延續，黑柴今輪同撐兩軍比賽細盤；最後多蒙特搏完歐聯未回氣，作客面對背水一戰的萊比錫輸體能，平手盤撐主隊。
