【地表最強】追風退熱值得再追
兆 文
第五場第四班1650米。「追風」上季三歲跑了四次，只跑過一席殿軍，踏入今季四歲進步顯著，尤其主攻谷草一哩戰績穩定，而未跑上仗之前，對上三戰更非冠即亞，成績優異。上仗相隔個半月出戰，更出到莫雅，人強馬壯理應會好，但可能休息太耐，追勢不似預期，只跑得第六名。
事實上，睇番「追風」之前在同程獲兩勝兩位，差不多每次都係抖三周出戰，所以上仗抖個半月根本存在隱憂，狀態非銳利，落敗未可作準。今次相隔兩周上陣，當然比起上仗有信心得多，況且分頭轉好可博性極高，而特意在周一出跳，好讓霍宏聲親試摸熟馬性，動態亦吸引不已。
第八場第三班1800米。「快路」一係贏晒，一係輸晒，皆因跑法被動，常常受制於慢步速，然而遇上了快步速就勁到飛起，上季兩勝末段爆發力嚇人，故此之後香港經典盃也有不少票數支持。未跑上仗之前，今季的「快路」苦戰多仗只交出一席亞軍，然而餘戰無一次輸遠，仲要這些賽事同樣步速不快。陣上既表現不差，仲要得到減分之利，上仗變身贏馬唔意外，驚喜是一直跑開田草1600米，初跑谷草1800贏馬，仲要配湯普新落重飛。事後看，落飛黨是看準該仗步速夠快，有利「快路」追趕形勢有利，但路程初跑可贏個半馬位，仲要未從轉腳側側，不排除根本是一匹谷草能手。
