祖兒用員工福利 晚晚睇霆鋒開騷
搞爛Gag激嬲老闆？
樂壇天后容祖兒昨日出席代言首飾記者會，對於同門謝霆鋒將會在啟德主場館開騷，祖兒笑言一直視對方為偶像，已自掏腰包買了多張門票，更稱會運用「員工福利」，每晚都入場欣賞，但就不會做表演嘉賓。
容祖兒昨日以代言人身份，到銅鑼灣英皇珠寶出席新系列首飾「SEE ME FLY」記者會，英皇集團主席楊受成博士專程到場。活動司儀問祖兒下一個首飾系列會選擇與關智斌（Kenny）還是謝霆鋒合作？她笑言：「Kenny，因為之前睇佢同衛詩雅嘅婚嫁首飾廣告，自己都想試吓同Kenny結婚。（霆鋒唔係你杯茶？）都想同霆鋒拉近距離，因為佢就嚟喺啟德開騷，方便攞飛。」再問下一個首飾系列想以歌名《越唱越強》還是《爭氣》命名？她笑言：「《爭氣》楊生做代言人，咁我揀《未知》，未知要等楊生示意，哈哈！」楊生搞笑扮嬲說：「我好嬲呀！竟然《爭氣》都唔揀。」祖兒笑言：「咁不如《還未》啦，還未出糧呀，講笑啫！」楊生笑言：「唔好亂講，影響股價。」引得全場大笑。
祖兒受訪時透露以歌曲《我的驕傲》歌詞「SEE ME FLY」為首飾系列命名，因覺得近年女性地位與信心愈越來愈強：「大家睇住我工作歷程，成長都有高高低低，一路認識自己，過程有否定、懷疑、冇信心，但去到依家嘅階段，係我最鍾意嘅階段，依家嘅我會知道自己好嘅地方，唔會好似以前冇信心，內心係最好嘅推動力。」
計劃請小朋友睇《哪吒之魔童鬧海》
提到她笑指未出糧，祖兒笑言搞爛Gag，與老闆關係似家人，對方平時很風趣，並強調公司多年來都準時出糧，更有多冇少。問到為何不選霆鋒拍結婚廣告？祖兒笑言：「因為霆鋒係偶像，點會同偶像結婚？同Kenny嘅感情就可以轉化喺結婚廣告，同埋頭貼頭影相，同Kenny會冇咁尷尬。如果同霆鋒，我驚俾佢一槌質落嚟！」她表示已自掏腰包買了多張霆鋒演唱會門票，但屆時會運用「員工福利」，每晚都入場支持，但就不會上台做嘉賓，因這個舞台是屬於霆鋒。她透露正籌備明年在港舉行演唱會，首選啟德：「50歲前一定成事。」
另外，祖兒首飾系列部分收益將會撥捐她的慈善基金，她計劃請小朋友入場欣賞內地大熱電影動畫《哪吒之魔童鬧海》。
