戲癡形容新作貼地似親身經歷 葉童與謝君豪「不瞅不睬」的緣分
葉童（Ceci）與謝君豪（豪哥）於電影《淺淺歲月》中合演婚姻破裂的夫妻，兩人首度在電影中合作，貴為影帝的豪哥被兩屆金像影后葉童「不瞅不睬」，原因是葉童一早已入戲，豪哥亦不敢怠慢即時「嚟料」，豪哥笑言遇上Ceci這個戲癡真夠好玩！Ceci讚新戲貼地似親身經歷，認為作品經得起時間考驗。 ●採：香港文匯報記者 阿祖 攝：北山彥
《淺淺歲月》改編自小說《完了，就是緣》，戲中Ceci與青梅竹馬的豪哥終成眷屬並育有一對子女，但丈夫出軌導致婚姻破裂，及後前夫病入膏肓，她仍悉心照顧堅守對真愛的信念。而小說作者是電影出品人兼編劇之一的謝淑芬，也正是她的親身經歷。將自己的故事拍成電影，謝淑芬表示每個人心目中總有一些人和事永遠會記掛住：「我就係擔心有一日忘記咗我同已過身的前夫，所以有一個念頭拍一部電影捉緊我同佢開心與不開心嘅生活點滴！」
Ceci與豪哥早於上世紀九十年代合作過舞台劇《上海之夜》，亦曾於電視劇合演許仙的父母，卻沒同場演出，今次是首度在電影中合作。豪哥笑說：「感覺好過癮，Ceci係好投入嘅演員，投入到唔睬我，其實佢只係投入在戲裏面嘅狀態，嗰場戲係講到我哋關係有少少唔好，呢個唔睬真係唔睬得好啱時間，好嘢，既然咁我都嚟啦！演員就要咁玩才好玩，真係戲癡嚟㗎！」葉童爭着解釋為何「唔睬人」：「原因都係豪哥時間有限，一嚟到就要拍！」豪哥亦解釋：「我係咁多組戲，個景拍一陣就要還，但一去到拍醫院，佢又唔同咗！」葉童笑說：「到我想睬你，你又唔睬我，又記仇！」豪哥再澄清：「嗰時我病咗呀嘛（劇情），就係咁就陰差陽錯，部戲亦係咁得意，我返去諗都覺得好得意，唔係刻意㗎。」
豪哥覺得與Ceci在電影中絕對起到化學反應：「寫咗個女人戲，就由陳果（監製）同導演兩個大男人撞個火花出來，真實地說故事，悲傷場面不會沉溺落去，總有些抽返出來令場面更加豐富，好似有場戲喺大排檔播《雪中情》音樂，唔會浪漫化一件事，所有嘢都好真，有喜有悲，有美麗亦有醜陋，呢個戲撞出個化學反應撞得好，我睇都覺得好睇。」Ceci認同電影好生活化，每場戲都似同自己有關，似親身經歷，無論環境、跟仔女和老公之間講的說話，都與生活中好相似，拍的時候好易投入。
而今次拍真人真事，更是老闆娘的故事，又會否感到壓力？Ceci笑言老闆娘都不會監場，只接近拍完才來片場握手自我介紹，透過看她的書，心裏已有點概念：「邊有一個人會固執得要將自己嘅故事拍出來，嗰份堅持不認輸一定要完成心願嘅性格，好港女，唔溫柔，但獨立自主，亦會嚇怕好多人，我就捉到呢啲性格，演出時透過佢嘅文字對佢嘅感覺去演繹，所以唔會覺得困難。」
手機拍攝無法取代攝像機
整部電影以手機拍攝，豪哥表示覺得頗有新鮮感，雖然演出初時會有點不習慣，會望鏡頭在哪裏，但慢慢就不會搵鏡頭，只搵到戲入邊的生活化。他又指手機拍攝也帶來方便，很多刁鑽角度像在電車狹窄的環境下，手機用一支棍仔就做到。不過女演員會否顧慮靚樣，手機沒攝影機般細緻？Ceci笑說：「我唔係貪靚嘅演員，我真係為戲而拍戲，其實好在有返咁上下演員經歷同經驗，因為用手機拍攝進度快好多，一來就要交功課畀料，所以全靠多年經驗累積。」
豪哥直言在開始拍攝頭幾個鏡頭都會有所懷疑到底能否拍出效果，但Ceci認為懷疑歸懷疑：「我冇可能不停咁質疑到底拍得好定唔好、靚定唔靚，我嘅職責係將個戲嘅感受以一個最真實的方法呈現出來。」豪哥覺得今次拍出來效果很有質感好真實，除了他們有經驗的演員配合，一些特約甚至非職業的演員都好夾，反而有時大機對着會演得不好，今次真的有生活感呈現出來。Ceci表示今次電影題材可以用這個方法呈現，因為似拍家中的video，但不代表手機可以取代傳統拍攝方式。
認作品經得起時間考驗
《淺淺歲月》報名今屆金像獎可惜未獲任何提名，但有資深電影人看過葉童的演出，形容她是今屆金像獎的滄海遺珠，以她的細膩演出應入「最佳女主角」五強之列，葉童聽到也感謝說：「多謝賞識，但我拍戲唔係為咗攞獎，有咁嘅評語係好開心，亦係賺咗！」問到豪哥與Ceci已經是影帝、影后級，會否覺得獎項已是一種鼓勵，情願選擇好角色去過足戲癮？豪哥笑着反問：「係咪一定要二選一先？人會貪心，梗係兩樣都要啦，無人會嫌少㗎！」
Ceci亦說：「我哋部戲的確相對比較另類，真如戲名《淺淺歲月》講淡淡嘅故事，冇刻意營造氣氛，冇刻意講男女關係，角色冇忠與奸，係清新嘅劇種，好特別，有機會演到今次角色已經好開心，喺港產片有一個女性角度嘅電影，有咁好嘅對手，又有不計較嘅老闆娘，已經係好難忘嘅經歷。」至於拿不拿獎，Ceci覺得大家可能仍未適應到這個方向：「或者兩年後大家睇到又有不同感覺，但會係一個經得起時間考驗嘅戲，因為與大家生活好貼近。」豪哥卻另有看法：「部戲看似好淡，但其實又唔淡，講嘅都係人生最大嘅一件事——生離死別，冇嘢比生離死別大，比家庭出現問題有戲劇性，只不過我哋選擇用唔係好戲劇性手法去表現，真實地呈現出來，我自己感受好深，夫妻關係值得反思嘅問題，自己睇完都再反思；戲入邊我喺商界叱咤風雲，但病就一無所有，似個細路仔去食孖條、坐電車搵回憶，都幾觸動到我！」
豪哥與Ceci原來是同年同月生，都是三月生日，兩人訪談間都盡顯默契開懷暢談。會否也期待下一次合作？Ceci笑說：「睇豪哥個期啦！」豪哥即笑答：「唔係呀，佢嘅生日願望係希望同我合作，我生日願望都係一樣！祝你生日願望成真！」葉童笑着道謝：「一於咁話！」
