倪樂琳食蟲嗌好味
由李家鼎、黃亞保、林正峰與應屆港姐冠軍倪樂琳（Ellyn）主持的旅遊節目《鮮美湛江美景遊》，為觀眾介紹湛江美景及美食。首度主持綜藝節目的Ellyn自爆首次食蠔，又徒手捉龍蝦，更要品嘗當地特色美食沙蟲及泥丁（又名泥蟲）。她受訪時表示：「好大突破，成世都冇辦法想像會將佢哋擺入口！我本身好怕蟲，更加唔好話擺入口，但為咗拍攝，我就鼓起勇氣試食，原來都OK好味嘅，尤其炸沙蟲，只要你唔好諗住佢係沙蟲就得。」
首度主持綜藝節目零怯場的Ellyn坦言，全靠3位前輩照顧：「鼎爺同保哥好照顧我，保哥會夾餸畀我哋，鼎爺就教咗我好多嘢，我記得頭一兩日，鼎爺見到我有啲位唔記得講嘢，佢會輕輕拍我，提我要講嘢喇，又教我講長稿嘅秘訣。」
