射門2:28 艾利臣9度救紅軍
昨晨歐聯16強首回合連場激戰，法甲一哥巴黎聖日耳門對英超一哥利物浦最具戲劇性。PSG一開賽即壓着紅軍狂攻，全場射門28:2，形勢一面倒！不過最終紅軍憑尾段入替的哈維艾利洛，在87分鐘建下奇功，逆境下作客贏1:0。32歲巴西門將艾利臣成為紅軍英雄，全場作出9次有效撲救，力挽狂瀾：「今場係我人生代表作，對手踢得非常出色，但我哋憑全軍努力取得收成，多美好嘅故事，一個美好晚上！」聖日耳門教練安歷基輸得極不服氣：「足球有時就係咁唔公平，我哋表現比利物浦強得太多！不過依家只踢完首回合，只要次回合我哋維持今仗水準，就可以晉級！」
拜仁慕尼黑於德甲內戰主場3:0擊退利華古遜，哈利卡尼今仗梅開二度，在今屆歐聯累積9個入球，於射手榜與巴塞隆拿拉芬夏及利雲度夫斯基並列次席，同以一球落後多蒙特的古拉斯。利華今仗防線連環犯錯，先有門將高華接球甩手送禮，然後右閘梅基尼魯莽兩黃一紅被逐，後段入替的塔蘇巴亦在禁區內不必要拉跌哈利卡尼輸12碼。利華教頭沙比阿朗素賽後極為失望，但堅稱並未放棄：「我哋仲有次回合主場賽事，但需要一場大奇跡！」
其餘兩仗，巴塞於早段有中堅古巴斯被逐劣勢下，憑拉芬夏一箭定江山，作客1:0擊敗賓菲加；意甲一哥國際米蘭顯示爭霸實力，作客2:0輕取飛燕諾。
